Lonjak etxebizitza bihurtzeko ordenantza aurkeztuko du biharko udal batzarrean EAJ, EA eta EB-Berdeak alderdiek osatzen duten Getxoko Gobernu Taldeak, bertan eztabaidatu eta bozkatua izan dadin. Iñaki Zarraoa alkateak azaldutakoaren arabera, "Bizkaiko Foru Aldundiak ez du onartu Udalak baldintza horiek Getxoko Hirigintza Antolamendurako Plan Orokorraren (HAPO) barruan sartzea, horretarako ordenantza berezitu bat egitea aproposagoa dela uste duelako". Ordenantza berria ekainean indarrean sartzea espero dute udal agintariek. Hortaz, data horretatik aurrera, geldiarazita dauden baimenak bideratu ahal izango dira. “Tramiteak ahal izan den neurrian arindu egin ditugu, lonjak etxebizitza bihurtzeko dirua gastatu zuten pertsonei kalterik ez egiteko”, zehaztu du Zarraoak.
Ordenantzak HAPO aurretik egindako eraikinetako lonjek bete behar dituzten baldintzak arautuko ditu. Babes ofizialeko etxebizitzetan, ordea, ezin izango da eraldaketarik egin. Gainera, ordenantzaren baldintza berrien artean honako hauek agertzen dira: lonjaren zoruak kalearen maila berean egon behar du, "batzuetan atarietarako sarrerak kalearen azpitik egoten diren arren"; kanpora ematen duen eremuan bi gela egon beharko dira gutxienez eta 6 metro baino gehiagoko fatxada; eta 37 metro koadro baino gutxiagoko azalera ezin izango dute eduki etxebizitzek. Bestalde, aireztatze filtro-sistemak egon beharko dira eta gutxieneko argiztapen egokia ere bai. “Ordenantzak etxebizitza duina izatea zaindu nahi du, baita aurretik zeuden baldintza batzuk aldatu ere, eraldaketak errazteko”, esan du Zarraoak. Hala ere, ez du bereizten non eralda daitekeen lonjak eta non ez “uste dugulako merkatuak berak galaraziko duela merkatalgune batean lonja bat etxebizitza bihurtzea, metro koadroa askoz garestiagoa baita”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun