"Transfer planta berria irekita, urtean Getxo udalerriko bizilagunek sortzen duten 30.000 sastar tona, eta egunero batzen diren beste 90 tona, Aldundiak finkatzen duen tratamendu gunera eramango dira gaurtik aurrera", azaldu du Iñaki Zarraoa alkateak. Izan ere, "udalerrian gauero batzen diren zaborrak zuzenean zabortegira kamioietan eramatea saihestuz, garraio kosteak murriztuko dira (bidaia gutxiago egin beharko delako), eta kamioiek eragindako kutsadura ere gutxituko da, baita zarata eta sastarren hatsa ere", gaineratu du udal agintariak. Getxoko transfer plantak emango duen zerbitzua nahi duten udalerri guztiek ere erabili ahal izango dute.
Hondakindegia ixteko ekitaldi sinbolikoan, Zarraoa "pozik" agertu da itxieragatik, alkatearen esanetan, “auzotarrek ingurumenarekiko duten ardurari erantzuten dion egitasmoa delako, baldintza egokiak ez baitzituen betetzen, eta udalerria asko hazi delako gune horretako inguruetara iristeraino”.
Transferentzia gunea
Transferentzia guneak hiru plataforma ditu: lehena hondakinak zamatzeko da; bigarren zabalgunean trinkotze ekipoak eta zapaldutako sastarrak gordeko diren edukiontziak daude; eta hirugarren plataformak barruan hartuko du etorkizunean birziklatze gunea, hiritarrek bertako edukiontzi irekietan hondakinak uzteko, ondoren birziklatzeko. Birziklatze gune berriaren lanen kostea ere Europako Batasunak finantzatuko du, diruaren %80a emanez.
Instalazio berrien barruan beste eraikin txiki bat dago etxeko hondakin pozoitsu eta arriskutsuak, hala nola, bateria, olio eta pinturak, batzeko. Birziklatze gunea zabaldutakoan batuko dira gai horiek. Zarraoak aurreratu du zabortegiaren 200.000 metro koadroko azaleraren zati handi bat gainera, herritarrek erabili ahal izango dutela datozen urteetan aisialdi eta jolaserako gune bezala.
Getxoko udal zabortegia itxi dute gaur goizean tokiko agintariek, "Europako Batasunak esparru honetan finkatutako irizpideak betez", eta aurrerantzean Bizkaiko Foru Aldundia izango da udalerriko sastarrak tratatzeko ardura hartuko duena. Larrañazubiko orubeko lurrak "berreskuratu" eta gero, hondakinak trinkotzeko transferentzia gunea izango da –gaur bertan zabaldu dena–; "etorkizunean ere zaborren gaikako bilketarako eta birziklapenerako zentroa hartuko du barruan", udal ordezkariek aurreratutakoaren arabera. Instalazio berri hauen kostea –laster altxatzen hasiko den ingurumen heziketarako gunea barne– 3.500.000 euro ingurukoa izango da, eta horietatik %80a Europak ipiniko du, kohesio funtsen kargura. Instalakuntza hauek handitu egingo dira laster hirugarren trinkotze lerro batekin, bere aurrekontua 1.700.000 eurokoa dela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun