Fadura DBH institutuko hirugarren mailako ikasleek "generoaren gaineko estereotipoak hautsi eta gazteen artean balore eta gaitasun berriak sortzeko" tailerretan parte hartzen ari dira egunotan, Getxoko Udalaren Berdintasun Arloak eta Gazteria Zerbitzuak antolatuta. Gaurko aurkezpen ekitaldian, Pedro Santamaria hezkuntza zentroko zuzendariak nabarmendu duenez, “lanak sexuaren arabera banatzeko egungo joeraren gaineko hausnarketa sustatu, pertsona bakoitzaren jokaera positiboak eta gaitasunak bultzatu, eta autonomia eta autoestimua lantzea dira, tailer hauetan finkatutako beste helburu batzuk”. Apirilaren 10era artean, bi orduko iraupeneko sei tailer egiten ari dira, sukaldaritza, iturgintza, joskintza, elektrizitatea, brikolajea eta zaintza pertsonalaren gainean; eta ordu beteko praktika hausnarketa pertsonala eta taldeko eztabaida pizteko, gazteentzako musika, aldizkari eta publizitatearen gainean.
Ikastaro hauek eskola orduen barruan egiten ari dira eta EHUko Hegoa-Nazioarteko Garapen eta Lankidetzarako Ikasketa Institutuaren Mundilab egitasmoaren barruan kokatzen dira. "Mundilab pedagogi berrikuntza, trebakuntza eta hezkuntza ikerkuntzarako egitasmo aitzindaria da, ikastetxeetan Garapenerako Hezkuntza eta zeharkakotasunaren praktika sustatu aldera", adierazi dute ekimenaren antolatzaileek. “Ikasgela-laborategia da, irakaskuntza esperimentalaren bitartez, jakingura suspertu eta ikaste esanguratsuak eragiten dituen hezkuntza ekintza garatzeko mundua aitzaki motibagarritzat hartzen duena”, gaineratu dute. Bere jomuga nagusiak, berton eta nazioartean "jakintza kritikoa suspertzea eta lankidetza eta elkartasuna sustatzea" dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun