Ostiral honetan, apirilak 7, Gaztetxe Martxaren aurkezpena egingo dute, 20:00etan, Leioako Udondo gaztetxean. Aipatu ibilaldiaren zergatiak eta helburuak azaldu eta gero, ekitaldira hurbildutako gazteek iritziak eta ideiak jasoko dituzte, martxa herritik pasatzen den egunean zer egin erabaki aldera. "Gazte Martxan parte hartzera ez ezik, euren ekarpenak egitera gonbidatzen ditugu leioztar neska-mutilak", adierazi dute antolatzaileek. Ondoren, merienda egongo da eta, egunari bukaera emateko, herriko bi taldek emango dute kontzertua: Jarraitu eta Kaskarreko. Sarrera dohainik.
Larunbatean aurkeztu zuten Gaztetxe Martxaren ibilbidea eta egitaraua Baraiñainen. Oraindik ere zehazteko gauza asko egongo badira ere, dagoeneko forma hartzen hasi da martxa. Zeharkatu dituen herriak (mordoa), herri bakoitzean egingo dena... guztia gauza baten seinale: Euskal Herria 16 egunetan zehar zeharkatuko duen Gaztetxe Martxa gero eta gertuago dago. Hain zuzen ere, apirilaren 21ean abiatuko da Mauletik, maiatzaren 7an Iruñan amaitzeko. Uribe Kosta eskualdera, apirilaren 30ean, igandearekin, helduko da ekimena Larrabetzutik (Txoriherri). Gazteek Urdulizen bazkaldu ostean, Sopela, Berango, Itzubaltzeta / Erromo eta Leioa zeharkatuko ditu martxak. Eta Udondo gaztetxean izango du geldiunea, bertan afaldu eta jaiaz gozatu ahal izateko. Uribe Kosta utzi eta Bilbon lo egingo dute gau horretan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun