Bilboko Alhondiga aisialdi eta kultur zentroak eta EHUko Arte Ederren Fakultateak (argazkian) lankidetza-hitzarmena izenpetu dute gaur. Horren bidez, bi erakundeen giza baliabide eta materialei "ahalik eta erabilerarik onena" ematen ahaleginduko dira. Era berean, "Arte Ederretako ikasleen heziketa praktikoa hobetzera eta kaleko egoera sozialaren eta sormen-alorreko punta-puntako joeren arteko lotura zuzena ezartzera zuzenduta" dago hitzarmena, erakundeko bateko zein besteko arduradunek adierazi dutenez. Bestalde, biek bideratzen duten jarduera garatzen lagunduko luketen ekintza espezifikoak antolatu ahalko dituzte elkarrekin: hitzaldiak, mintegiak, ikastaroak edota batzarrak, besteak beste. Lehen ekimenetariko bat Arte Ederren Fakultateko ikasleei zuzendutako heziketa-beka (pdf) izango da. Horri esker, Parisko Cake Design diseinu-estudioan urtebetez praktikak egiteko aukera izango dute neska-mutilek.
Bekak 12.000 euroko zenbatekoa izango du eta bekaduna Parisen bizi ahal izateko gastuak ordaintzeko balioko du (bidaiak, etxebizitza, mantenua eta hiriburuko joan-etorriak). 2006ko irailean edo urrian jarriko dute abian. Trebakuntza-aldi horretan, ikasle bakoitzak bere esperientzia profesionalari buruzko informazioa bidali beharko du hilero eta informazio hori Bilboko Alhondigako web-orrian jarriko dute. Praktikak amaitu ostean, berriz, bi aleko memoria egin beharko du bere esperientziaren gainean eta beka amaitu duen egunetik hasita, hiru hilabeteko epean aurkeztu beharko du gehienez. Horretara Diseinu Grafiko profilarekin aurtengo ikasturtean edo azken bi urteotan lizentziatu diren Arte Ederretako Fakultateko ikasleak soilik aurkeztu ahalko dira, eta izen-emateko azken eguna maiatzaren 20a izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun