AEK Eguna AEK-ko ikasle, irakasle, laguntzaile zein AEKren helburuekin bat egiten duten guztien eguna da, eta urtean behin ospatu izan da 1988an lehenengo aldiz Hernanin antolatu zenetik.
AEK Eguna berreskuratuz
Harrezkero AEK Eguna honako leku hauetan antolatu izan da 2003 urtera arte: 1988an Hernanin, 1989an Ondarroan, 1990ean Atarrabian, 1991n Agurainen, 1992an Lezon, 1993an Arrigorriagan, 1994an Tafallan, 1995ean Zumaian, 1996an Donapaleun, 1997an Portugaleten, 1998an Legution, 1999an Saran, 2000 urtean Lizarran, 2001ean Zestoan, 2002an Santutxun eta 2003an Abetxukon.
Bi urteko etenaldiaren ondoren, 2006an 17. AEK Eguna ospatuko dugu, oraingo honetan Larrabetzun (Bizkaia). Ohiko data aldatu eta, ikasturte amaierako jai erraldoia izateko asmoz, ekainaren 10ean izango da aurtengo AEK Eguna. Horretarako bereziki ikasle eta irakasleen parte hartzea bultzatuko duen egitaraua prestatzen ari da AEK.
Erakusketa honako data eta lekuetan egongo da ikusgai:
- maiatzaren 2tik 5era: Leioako Mastitxu Udal euskaltegian
- maiatzaren 8tik 12ra: Itzubaltzeta / Erromoko Santa Eugenia kultur etxean
- maiatzaren 22tik 26ra: Plentziako Goñi Portal kultur etxean
- maiatzaren 29tik ekainaren 2ra: Mungiako Mugire Txokoan
- ekainaren 5etik 9ra: Arrietako kultur etxean
AEK Egunaren atzerabegirako erakusketa izango da eskualdean maiatzaren 26ra arte
Aurten ekainaren 10ean ospatuko den AEK Egunaren harira, Uribe Kostako AEK-k eta Uribe Butroeko AEK-k AEK Egunaren gaineko erakusketa antolatu dute. Erakusketaren bidez AEKren historian atzera jauzi egin eta orain arteko AEK Egun guztietako kartelak eta irudiak ikusteko aukera egongo da gaurtik aurrera. Izan ere, erakusketa gaur abiatuko da Leioako Mastitxu Udal Euskaltegian eta bertan izango da ostirala arte. Baina, datozen asteotan ere Uribe Kostako beste herri batzuetan izango da erakusketa ikusteko aukera. Hala nola, Itzubaltzeta / Erromon zein Plentzian. Geroago, Uribe-Butroera egingo du txangoa AEK Egunaren inguruko bildumak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun