Maiatzaren 14an, igandea, ospatuko da aurten Herri Urrats festaren 23. edizioa. Urtero bezala, jende andana espero dute Senpereko aintziraren inguruan, Iparraldeko ikastolei babesa emateko asmoz. Antolatzaileek gaur agertu dutenez, egun horretan bildu ohi den dirurik gabe, Seaskako ikastolek ezin izango lukete aurrera egin. "Aintzirarat" leloaren bidez, gonbitea luzatu diote nahi duen orori festaz gozatzera hurbildu dadin. Mundu guztiari esan nahi diote Herri Urratsera hurbil dadin, aintziraren inguruetan gozatzeko. Alabaina, jendeaz gain, dirua behar dute.
Oholtza gainean hogeita bost ikuskizun baino gehiago egongo dira aukeran, tartean zirkoa, Ken7 taldearen kontzertua edota Korsikako Canta u Populu Corsu ospetsua. Berrikuntzen artean, jendartean nahasirik emango den Maskarada. Baina, urtero bezala, zalantzarik gabe, giroa izango da aipagarriena, milaka lagun, helburu berberarekin, egun beteko festan. Maiatzaren 14an, Senperen, hain justu, "Aintzirarat" lemapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun