Beste urte batez, Algortakoak emango dio hasiera EAEn egiten diren jazzaldi sortari –ondoren izango dira Gasteizkoa (uztailaren 8tik 15era) eta Donostikoa (uztailaren 21etik 26ra)–, "betiko ezaugarriei eutsiz gainera", Iñaki Saitua jaialdiko arduradunak gaur adierazitakoaren arabera. Europar izaera mantentzeaz gain, aurten ere banda gazteek tokia izango dute Getxoko Jazzaldian, talde lehiaketaren bitartez. Saituak zehaztu duenez, 23 herrialdetatik etorritako 73 talde aurketu dira txapelketara eta, horietatik, lau aukeratu dituzte: Magnus Mehl Quintet (Alemania), Exit 418 (Errusia), Jazz Kamikaze (Danimarka) eta Martin Auer Quintet (Alemania), uztailaren 1etik 4ra bitartean jotzeko. Irabazlea, berriz, Lockwood-Cobham String Quartet-en hasierako taldea izango da, azken egunean. Horretaz gain, 3.000 euro, garaikurra eta diska egiteko aukera emango diote txapeldunari.
"Aurreko urteetako irabazle askok jazz talde onenekin jotzen dabiltza gaur egun, 2000an txapeldun izan zen Magnus Lingren Quartet kasu", aipatu du Saituak. Gainera, Getxoko Jazzaldiaren 30. urteurrena aitzaki, dagoeneko Algortan izan den musikariren bat izango da joko duten talde guztietan.
Uztailaren 1etik 5era bitartean egingo den Getxoko Europar Jazzaldiaren 30. edizioak baditu jada izen-abizenak. Aurten, Eddie Palmieri & Afro-Caribbean Jazz All-Stars, Didier Lockwood-Cobham String Quartet, Philip Catherine Trio, Miroslav Vitous-John Abercrombie eta Benavent-Di Geraldo-Pardo hirukotea bezalako musika taldeez gozatu ahal izango dute Algortara hurbiltzen direnek, horiek izango baitira jaialdiko emanaldi nagusietako protagonistak. Ohi bezala, Biotz Alai plazak jasoko ditu artista garrantzitsuenen emanaldiak, talde lehiaketakoekin batera, 21:30etik aurrera. Getxo Antzokiko plazan, berriz, Hirugarren Milurtekoa ataleko kontzertuak izango dira eta Jam Session-ak Piper´s Irish Pub-ean. Horretaz gain, herriko kaleak musikaz beteko ditu bost egunetan zehar musika-banda batek eta argazki-erakusketa egongo da Satistegi tabernan. Argazkian, Didier Lockwood biolin jolearekin batera, talde lehiaketako irazbazlearen ondoren joko duen Billy Cobham bateria jolea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun