Bertso-kabaret ikuskizuna pasa den hilaren 8an aurkeztu zuten Enbeitak, Ibarrak eta Pereak Larrabetzun, Bertsozale Gazteen III. Egunaren harira, ondoren 15ean Bakion aritu ziren.
Ikuskizunean, antzerkia, bertso jarriak, poesia eta musika uztartzen dituzte hiru bertsolari gazteek. Era umoretsuan, immigrazioa, prostituzioa edota sorginkeria bezalako gaiak jorratzen dituzte beti ere emakumeen ikuspegitik. Onintza Enbeitaren esanetan, "bat-bateko bertsoa jantzi, eta sentimenduak biluztu, gauza askoren inguruan kantatu nahi dugu. Ez gara dantzan hasiko. Emakumea bertsolaritzan ere lekua irabazten ari da, baina eskemak oraindik oso arrak dira, pentsaera orokorra oso arra da". Izan ere, bere ustez, Emeki-egileak "femeninoagoak izan nahi dugu".
Emakume bizkaitarrak
Ikuskizunaren izena ere kabaretak bermatzen duen arte ezberdinen nahasketa eta protagonistak emakumeak direla islatu nahi du. Horrela, izena berak baldintza horiek betetzen ditu, hitz jokoaren bitartez: "bizkaieraz, herri hizkeran emetik esaten da hemendik esateko, eta emetasunetik egiten dugunez, hitz joko hori egin nahi izan dugu".
Baina nahasmenak eta bapatekotasunak ez dute eztaltzen ikuskizunak duen barneko lana: "emanaldi bakoitzaren aurretik eskema bat lantzen dugu. Zer esan gura dugun, prostituzioaren inguruan aritu nahi dugun, langabeziaz... eta umoretik, publikoa gure ikuskizunean inplikatu nahi dugu. Gaiak aurkezteko modua ere diferentea da. Elementuak erabiliko ditugu, jantziak, ileordeak, txapelak..." gaineratzen du Onintzak.
Gaiari buruzko berriak:
Emeen bidaia hasi da (Matraka.info)
Itzubaltzeta / Erromoko gaztetxea kabareta bihurtuko da bihar iluntzeko 20:30ean, baina ez edozein moduko kabareta, goi mailako bertso-kabareta baizik. Segi gazte erakundeak antolatuta, guztiz berria den kultur-eskaintza izango da ikusgai gaztetxean: "Emetik" bertso-kabareta. "Emetik" taldea bertso munduan ezagunak diren hiru neskaz osatua dago, bertsoaz gain antzezle kutxua ere baduten hiru gaztez: Iratxe Ibarra, Onintza Enbeita eta Oihane Perea. Gaurdaino ezezaguna zen formatuan, Iratxek, Onintzak eta Oihanek ikuskizun berezia eskainiko dute Itzubaltzeta gaztetxera hurbiltzen den ororen gozamenerako. Segiko kideek jakinarazi dutenez, "sarrera doakoa izango da, eta borondatean baino ez da mugarik egongo". Irudian, Matrakak kaleratutako argazkiarekin egindako muntaia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun