Kokalekua dela-eta, “eraikinak itsasoa ikusteko moduan diseinatu beharko dira”, gaineratu dutenez. Etxebizitzak lau etxe-multzotan egongo dira banatuta, lorategi pribatua duen beheko solairua, beste estai bi eta terrazadun atikotan antolatuta. Sotoan aparkalekuak eta trastelekuak egongo dira eta lur-zati itxiak izango dira, denontzako hornidurekin.
Itxarote-zerrenda
Etxebizitzak bi motatakoak izango dira: 46 salmenta askekoak eta beste 56 babes-araubidearen pean egongo dira, tasatutako prezioan, Eusko Jaurlaritzak BOEetarako ezarritako irizpideen eta merkatuko prezioen arteko erdibidean. Horiek emateko irizpideak Udalak ezarriko ditu; hain zuzen ere, bera arduratuko da zozketa egiteaz. Gaur egun, Lemoizen 300 lagun daude itxarote-zerrendan, etxeak eskuratu ahal izateko baldintzen oinarria zehaztu arte.
Lemoizko Udalak eta Neinor enpresa-sustatzaileak sinatutako hitzarmenari esker, 102 etxebizitza –horietako 56 babestuak– egingo dituzte Armintzako portuaren (argazkian) inguruan, udal iturriek jakinarazitakoaren arabera. Pedro Jesus Botejara alkatea pozik agertu da, “proiektu honi esker eragozpen handienak dituzten kolektiboek, esaterako gazteek, etxebizitza errazago eskuratu ahal izango dutelako”. Neinor-ek, bere aldetik, 20 milioi euro inbertituko ditu egitasmoan, eta bozeramaile batek nabarmendu duenez, “akordio honen bidez sendotu egingo da auzoa, hirigintzari dagokioez”. Etxebizitzak portua eta hondartza artean eraikiko dituzte, 20.000 metro koadro dituen orubean, “ingurune horretan hori baita azken lurzoru eraikigarria”. Urbanizatzeko obrak zein merkaturatzea “datorren urteko udan” hasiko dira, sustatzaileak berretsi duenez eta pisuak entregatzeko epea bi urtekoa izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun