Lemoizko Udalak Armintzekalde hondartzako hiru sarbideak hobetzeko obrei ekin die. Lan horiek “udako denboraldia hasi baino lehenago hastea aurreikusita dago”, Pedro Jesus Botejara alkateak adierazitakoaren arabera. Hobekuntza-proiektu horrek 10.835 euroko inbertsioa ekarriko du, udal kutxaren kontura. Besteak beste, iparraldean, eskailera maila bat egin eta hormigoi armatuzko betelana egingo dute dutxak dauden aldean. Udalbatzak onartutako egitasmoak, gainera, areatzako sarbidearen alde zaharra berriarekin lotzeko egitura bat eraikitzea aurreikusten du. Hori, 8 milimetroko diametroa duten altzairu uhinduzko baranda ainguratuekin osatuko dute, udal iturriek jakinarazi dutenez.
Bigarren sarbidean, hondartzako ekialdeari dagokiona, hormigoizko eskailera maila bi egingo dituzte eta metro bateko altuera izango duen altzairu herdoilezinezko baranda instalatuko dute. Azkenik, hegoaldean, hormigoitze lanak egingo dira lurzorua erregularizatzeko, eta lehendik bertan zegoen mehelinari atxikita horma bat altxatuko dute. Gaur egungo arrapaleko “baranda eraitsiko da, eta horren ordez 30 metroko luzera izango duen eskudel berria jarriko da. Eskudel hori bost metro inguru luzatuko da harkaitzetan, alde guztiko babesa hobetzeko”, Botejarak zehaztu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun