Areetako Santa Ana plazako lanetarako 640 mila euro jarri ditu Getxoko Udalak
Areetako Santa Ana plaza urbanizatzeko proiektuaren (pdf formatuan) lanak agindu zituen Getxoko Udalak joan den astean 641.338 eurotan eta 2007ko otsailerako amaitzea aurreikusita dago. “Oso egoera txarrean dagoen zorua konpontzeaz gain, lan horiekin, herritarren gozamenerako tokia irabaziko da plazan: espaloiak apur bat txikituko dira, trafikoa astiroago joatea eragingo da oinezkoentzako pasabideak espaloien parean ipiniz eta Maximo Agirre kaleko autobusaren geltokia plazara aldatuko dute”, udal arduradunen hitzetan. Proiektua ikusgai izan zen bitartean bildutako iradokizun batzuk ere kontuan hartuko dituzte, horien artean, iturri bat jartzea, plazako erdiko gunerako Bilbao motako lauzatxoa ez erabiltzea (Xake plazan dagoenaren antzekoa ipiniko da) eta ahal den neurrian berdegunea zabaltzea, beste iradokizun batzuek jolasteko tokiei lehentasuna ematea eskatzen baitzuten. Azkenean, adinen araberako bi gune izango dira eta beste toki bat patinatzeko.
Inguru osoa oinezkoentzat bihurtzea eskatzen zuen proposamena momentuz ez da beteko. Hala ere, Iñaki alkateak gogoratu du etorkizunean Hiri Antolaketarako Plangintza Orokorrak (HAPO) Maximo Agirre eta Santa Ana kaleetako bi etxebizitza sailetan hori egiteko aukera aurreikusten duela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun