Azken azterketa honen ondorio nagusietakoa da “aztertutako lau sektoreetako bakoitzean euskararen erabilera oso bestelakoa” dela. Ikastetxetan eskolaz kanpoko jarduera gehienak euskaraz egiten dira (%45), langile gehienek hizkuntza ezagutzen dutelako. “Halere, jarduera horiek egiten direnean, gazteek gaztelaniaz egiten dute euren artean”, nabarmendu du Imanol Landa Euskara zinegotziak. Akademia pribatuetan egoera “uste baino hobea” da, askok eskaintzen baitituzte jarduerak edo eskola partikularrak euskaraz. Halere, sarritan eragozpenak izaten dituzte euskarazko taldeak osatzeko edo irakasle euskaldunak kontratatzeko.
Elizek, berriz, “elebitasunaren aldeko apustu argia” egin dute idatzizko komunikazioan, azterlanaren arabera. Halere, ahozko komunikazioan gaztelania da nagusi. Azkenik, laugarren sektorean, hau da, haurtzaindegietan, “egoera nabarmen hobetu daiteke”, Landaren hitzetan, “langileen artean euskara dakitenek gutxi direlako oraindik”. Hala ere, arduradunek “interes handia” dute euren jardueran euskara sustatzeko neurriak hartzeko orduan, Euskara zinegotziak azpimarratutakoaren arabera.
Sentsibilizazio kanpaina
Datu hauen aurrean, Euskara Zerbitzuak “neurriak” hartu ditu egoera hobetu aldera. Sentsibilizazio kanpaina abiatuko du sektore hauen eta herritarren artean 35.000 liburuxka banatuz. Azterlanaren ondorioen berri emango dute bertan. Eta, ohikoak direnak ez ezik, aparteko dirulaguntzak ere emateko deialdia egingo dute, sektorean euskara sustatzeko. Horretaz gainera, pertsona bat kontratatu dute dinamizatze eta informazio lanak egiteko eta lan-taldea sortu dute inplikatutako erakundeekin. Landak nabarmendu du, azkenik, 43 izan direla orain arte eskolaz aparteko jardueretan euskara sustatzeko IkasGehin jasotako konpromisoren bat hartu duten eragileak.
Informazio gehiagorako hurrengo loturan sakatu: IkasGehi
Eskolaz kanpoko jarduerak antolatzen dituzten erakundeak "gero eta prestatuago daude ele bietan jarduteko" Getxoko Udalaren arabera
Getxo udalerrian eskolaz kanpoko jarduerak antolatzen dituzten erakundeak “gero eta prestatuago daude ele bietan jarduteko” haur eta gazteekin, Getxoko Udal Euskara Zerbitzuak ikastetxeetan, haurtzaindegietan, elizetan eta akademia pribatuetan egindako ikerketaren arabera. Lau sektore hauek dira, nagusiki, mota horretako ekintzak antolatzen dituztenak, eta 0 eta 18 urte arteko 7.000 haur eta gazte biltzen dituzte. Azterlana gaur aurkeztu dute prentsaurrekoan, eta euskara eskolaz kanpoko jardueratan sustatzeko IkasGehi egitasmoaren harira dator. Programa, halaber, euskararen erabilera biziberritzeko udal egitasmoaren barruan dago. Azterlana 69 erakunderi zuzendu zitzaien eta horietatik 58k erantzun zuten iaz Euskara Zerbitzuak proposatutako inkesta. Antzeko ikerketa egin da herriko beste bi sektore garrantzitsuetan, alegia, merkataritzan eta gazte taldeen artean. Hain zuzen ere, joan den astean aurkeztu zuten Gehi Euskara Merkataritzara egitasmoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun