Burzakok emandako datuak ere gezurtatu ditu Aldekoak. Batzarkide popularrak 2002an Eusko Jaurlaritzak egindako ustezko txostena erabili du, Gobela ibaian 80eko hamarkadan hektareako 46.500 arrain hiruarantza zeudela adierazteko. Horrekin alderatuz, 2006ko apirilaren 4an Eusko Legebiltzarrean aurkeztutako txosteneko datuak eman ditu: "Horren arabera, 2004an, 100 metro koadroko bi arrain baino ez zeudela baieztatu zuen Ingurumen sailburuak; eta 2005ean, bat ere ez. Hortaz, desagertzeko arriskua handia dela argi dago, Burzakoren gustukoa izan ala ez", aipatu du. Bolue hezegunean eta Larrañazubi errekan "are larriagoa" da egoera, popularren hitzetan. "Getxoko Udalak berak onartu zuen 2003an arrainik ez zutela aurkitu, urte batzuk lehenago bazegoen arren", nabarmendu du Aldekoak.
"Axolarik ez"
"Burzako jaunak hobe luke arrain hiruarantza salbatzeaz kexkatzea eta Aldundiari Kudeaketa Plana onartzea eskatzea, PPren proposamena hutsala eta alderdikoia dela esatea baino", kritikatu du Aldekoak. Ahaldun popularraren hitzetan, 2002tik hona plana aplikatzea eskatzen dabil Eusko Jaurlaritza, "baina, antza, Aldundiari eta Getxoko Udalari bost axola; arrain hiruarantza inporta zaien gauza bera, alegia".
Gaiaren inguruko berriak:
Arrain hiruarantza "ez dago desagertzeko arriskuan" Getxoko Udalak dioenez (2006 Mai 25)
Gobela eta Asuan arrain hiruarantza babesteko eskatuko du PPk (2006 Mai 16)
Arturo Aldekoa Bizkako Batzar Nagusietako PPko ahaldun eta aipatu erakundeko Nekazaritza eta Ingurumen Batzordeko idazkariak Fernando Burzako Getxoko Udaleko Ingurumen zinegotziak atzo egindako adierazpenak gezurtatu ditu gaur: "Arrain hiruarantzaren egoera kritikoa ez dela baieztatzea, ez ikusiarena egitea baino ez da, Bizkaiko Foru Aldundiari bere betebeharrarekin konplitu dezala eskatu behar ez izateko", adierazi du. Gaineratu duenez, "espeziea desagertzen ari den bitartean, beste aldera begiratzea nahiago du Burzakok. 2002tik darama Aldundia horren gaineko Kudeaketa Plana onartu gabe, arrain hiruarantza salbatuko luke horrek. Baina, inortxo ere uler ez ditzakeen arrazoiengatik, plana onartzeari uko egiten diote foru erakundeak eta EAJk, idatzi zenetik lau urte daramatzanean mahai gainean".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun