Getxoko Udalak herriko eraikin adierazgarriak babesteko plan bereziaren idazketa agindu du 29.522 euroko zenbatekoan. Kultur ondasuntzat hartuta dauden edo erakunde batek babestutako eraikinen ganeko ikerketa egitea da asmoa, eraikin bakoitza babesteko ezaugarriak zehazteko; baita dagozkien arauak eta kasu bakoitzean nola jokatu behar den aldez aurretik finkatzeko ere. “Horrela, sor daitezkeen eraikuntza proiektuak arindu nahi ditugu, Hiri Antolaketarako Plangintza Orokorrak (HAPO) ezarritako irizpideak kasu batzuetan ez baitira nahikoak izan eta, gaur egun, aldaketa batzuek Bizkaiko Foru Aldundiaren edo Eusko Jaurlaritzaren baimena jaso behar baitute”, azaldu zuen atzoko prentsaurrekoan Iñaki Zarraoa alkateak. Argazkian, Santa Klara egoitza.
Aipatutako bi erakundeen oniritzia eduki beharko duen plan berriari esker, eraikin bakoitzean zein lan egin daitekeen jakin ahal izango da eta "horrek edozein proiektu arinduko du", udal arduradunen hitzetan. Ezaugarri hauetako eraikin gehienak jabego pribatukoak dira, baina publikoak ere badaude, esate baterako udaletxea, Santa Klara jauregia eta Etxe Arrosa. Gainera, Getxo udalerriak babes bereziko ingurua ere badauka, kostaldetik hurbil, batez ere Portu Zaharra, Ereaga, Neguri eta Zugatzarte hartzen dituena. Kultur ondasuntzat hartuta dauden beste eraikin batzuk ere badaude, horien artean, Bizkaiko Zubia, Andra Mari eleiza eta San Nikolas plazatik Portu Zaharrerako bidean dagoen baserri bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun