Roberto Laiseka Euskaltel-Euskadiko txirrindulariari atzo egin zioten ebakuntza ederki irten da eta Giroan izandako erorikoan apurtutako errotula konpontze bidean dago. Ziklista bizkaitarrak duen adinagatik, 36 urte, txirrindularitza utziko duen zurrumurru asko zabaldu ziren, baina Algortakoak argi dauka: "txirrindularitzan jarraitzeko gogoak ez zaizkit falta", Eitb24 webguneak zabaldutakoaren arabera. Ziklistak prentsaurrekoa eman du gaur goizean Gasteizko erietxean, ebakuntza egin zioten lekuan, eta Mikel Sanchez medikua eta Igor Gonzalez de Galdeano algortarraren ondoan izan dira. Laiseka Euskaltel-Euskadiko txirrindulari beteranoak belaunburua hautsi zuen, joan den ostiralean, Italiako Giroko 12. etapan, eroriko larri baten ostean.
"Hobeto nagoela dirudi, nahiz eta ebakuntza egin didaten lekuan min apur bat dudan oraindik, baina pixkanaka minek behera egin dute. Moralki ere hobeto nago istripua duela egun ugari pasa baitzen", adierazi du Laisekak. Bestalde, txirrindularitza profesionala uzteko asmorik ez duela adierazi du Algortako eskalatzaileak. "Pausoz pauso joango naiz errekuperazioan, denak nola eboluzionatzen duen ikusteko eta ez dut eperik ipiniko. Halere, dudan guztia emango dut gauzak ondo atera daitezen eta gero ikusiko dugu noiz itzuli naitekeen bizikleta gainera", esan du bizkaitarrak. Beraz, bizikleta gainean jarraitzeko asmoa duela argi dauka Laisekak, eta Mikel Sanchez medikuak esan duenez, "datorren denboraldian hasi ahalko du seguru aski".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun