Zabortegiaren auzia berriro mahaigaineratuz, "kudeatzaile ezin txarragoa" izatea egotzi dio Zarraoari Getxoko PPk
Joan den ostiraleko udal batzarrean, Iñaki Zarraoa alkatea "udal interesen kudeatzaile ezin txarragoa" dela "berriro ere" argi geratu zen, Getxoko PPk gaur salatutakoaren arabera. "Gai-zerrendaren hiru puntuk agerian utzi zuten EAJ, EA eta Ezker Batuaren Gobernu Taldeak egindako udal txostenen gestioa narrasa", azaldu du prentsa-ohar bidez, Marisa Arrue popularren bozeramaileak. Modu horretan jardun da oposizioko zinegotzia, Bizkaiko Foru Aldundiak atzera botatako Hirigintzako Antolaketarako Plangintza Orokorrean (HAPO) egindako aldaketa, "beharrezko agiriak ez zirelako aurkeztu" eta Iturribarri aldeko auzotarrek aurkeztutako errekurtsoa aintzat hartu behar izatea, eremu horren gaineko berritze plangintza berezian "forma-akatsa" zegoelako. "Horri, orain urte bat zabortegia berriro zabaldu behar izateagatik Getxoko Udalak egindako 460.000 euroko zarrastelkeria gehitu behar zaio", jarraitu du Arruek.
Hain zuzen ere, 2005eko maiatzeko osoko bilkuran, Getxoko hiri hondakin solidoen kudeaketa Zabalgarbiri ematea atzera bota zen, udal gobernuko kide den EB-Berdeak taldeko zinegotziek ere aurka bozkatu zutelako; zabortegia ixteko aukera bertan behera utziz, beste konponbideren bat aurkitu arte. Azkenik, 2006ko apirilean itxi zuten zabortegia, Bizkaiko Foru Aldundiarekin hitzarmena sinatu ostean. Horiek horrela izanda, Udal Gobernua egiten du hilabete horietan zabortegia irekita mantendu behar izateagatik gertatutako "diru zarrastelkeria" horren erantzule Getxoko PPk, "irtenbide bat bilatzeko gainontzeko alderdiekin negoziatzeko gaitasunik eza nabarmena erakutsi zutelako". "Hori gutxi balitz, guri bota nahi dugu kudeaketa kaskar horren errua –Zarraoari buruz–, eurek gehiengo osoa daukatela ahaztu izan balu bezala", kritikatu du Arruek. Kontuak kontu, ostiraleko udal batzarrean onartu zen diru horren ordainketa, EAJ, EA eta Ezker Batuaren botuei esker.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun