Zabortegiaren gainean Ezker Batuak izandako jarrera "koherentetzat" jo du Zarraoak; PPrena, ordea, ez
2005eko maiatzeko udal batzarrean Ezker Batuak Zabalgarbiren alde bozkatu izan balu, zabortegia lehenago itxiko zela onartu du, Getxoko PPk egindako kritikei erantzunez, Iñaki Zarraoa alkateak. "Hala ere, zehaztu beharra dago EBk badaukala horren aurka egiteko arrazoi bat, errausketaren kontra daudela, alegia", gaineratu du. Popularren izandako jokabidea, aldiz, "ulergaitzat eta arduragabetzat" jo du udal agintariak: "Kezkagarriena da PP badagoela errausketaren eta hondakinen kudeaketarako foru plangintzaren alde eta, hala eta guztiz ere, aurka bozkatu zuela, oposizio axolagabea egitearren". Ondoren, Aldundiarekin hitzarmena sinatzea eskatu zutela ere gogoratu du Zarraoak, "eta aipatu akordioa lortu eta osoko bilkuran aurkeztu genuenean berriro egin zuten kontra".
"Hori al da Getxoko PPkoen koherentzia!" jarraitu du Zarraoak, Leioako popularren eta aipatu alderdiko Batzar Nagusietako ordezkariek "eredugarritzat" jotzen dutenean Getxoko Udala eta Aldundiaren arteko hitzarmena. Alkate getxoztarraren hitzetan, "diru arazoa baino, hondakinen kudeaketa eta ingurumen kontua" da udal zabortegiaren auzia. Are gehiago, gertatutakoarekin "dirua aurrestu" dela adierazi du. Berak azaldutakoaren arabera, "2005eko udal batzarrean onartu izan balitz hondakinak Zabalgarbira eramatea, uztailean egongo zen itxita zabortegia; eta data horretatik, 2006ko apirilean Aldundiarekin zabortegia ixteko behin betiko hitzarmena sinatu arte, 1.350.000 euro (9 hilabete x 2.500 tona hilabetean x 60 euro tona bakoitza) gastatuko genituzkeen", beste 460.000 euroren aldean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun