Irantzu Gallastegi (argazkian) Berangoko euskal preso politikoak epaiketa bi izango ditu ekainean, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Lehenengoa, datorren astean izango da, ekainaren 14an, Espainiako Auzitegi Nazionaleko 3. sekzioan. Jose Luis Caso Errenteriako PPko zinegotziaren hilketan parte hartzea leporatzen diote. Bigarren epaiketa, berriz, ekainaren 19, 20 eta 21ean egingo da, Espainiako Auzitegi Nazionalaren 1. sekzioan, Ermuko PPko zinegotzia zen Miguel Angel Blanco bahitzea eta hiltzea egotzita.
ETA erakunde armatuak 1997ko abenduaren 1ean hil zuen Jose Luis Caso Irungo PPko zinegotzia. Hain zuzen ere, atentatu horretan parte hartzea leporatzen diote Gallastegiri eta fiskalak 30 urteko espetxe zigorra eta kalte ordainak eskatzen dizkio. Xabier Garcia Gaztelu "Txapote" ere epaituko dute auzi horrengatik eta Ana Belen Egues eta Sebas Lasa euskal preso politikoak lekuko gisa agertuko dira. Bigarren epaiketari dagokionez, Miguel Angel Blancoren bahiketagatik 20 urteko espetxe zigorra eta Ermuko PPko zinegotziaren hilketagatik beste 30 urte eskatzen dute berangoztarrarentzat. Horrezaz gain, espetxetik irten ondoren Ermuatik 5 urteko urruntasuna eta kalte ordaina ere eskatzen diote. Horretan ere Irantzurekin batera Xabier Garcia Gaztelu epaituko dute, eta Ibon Muñoa, Kepa Etxeberria, Gregorio Eskudero eta Sebas Lasa euskal preso politikoak lekuko gisa agertuko dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun