Gaur eguerdian Arkautin egindako bileran, Udaltzaingoen Koordinaziorako Batzordearen egitura organiko berria aurkeztu du Herrizaingo Sailak, aldaketa nagusiak gehienbat Batzorde horri eragingo baitio zuzenean. Udaltzaingoen Koordinaziorako Zuzendaritza berria eratuko dute Batzordearen barruan, Eudelek eskatuta, “Ertzaintzaren eta Euskal Autonomia Erkidegoko Udaltzaingoen arteko harreman eta koordinazio ez operatiboetarako tresnak ezartzeko helburuarekin”.
Herrizaingo Sailak beste autonomia erkidegoetan dagoen erregistroaren moduko bat sortzeko dekretuaren zirriborroa aurkeztu du Euskadiko udaltzainen erregistroa sortzeko, bertan zaindari, jagole, aguazil eta antzeko izena hartzen duten guztiak barne hartuko dituela. Erregistroa ez da publikoa izango, eta “bertara bakarrik sartu ahal izango dira udalak, euren zerbitzura dauden langileen datuen berri izateko, eta udaltzainak, euren datu pertsonalen berri izateko”.
Gainera, Batzordean sei lantalde eratu dituzte, ahal den neurrian, eta betiere udal bakoitzaren nahiaren arabera, planteamenduak bateratzeko, besteak beste, honako arlo hauetan: aukeraketa eta trebakuntza, hornikuntza, komunikazioa eta informatika, jarduteko, antolatzeko eta funtzionatzeko prozedurak eta Poliziaren funtzio publikoa. Azkenik, Eudelekin kolaborazio finkoa ezarriko dute, taldeek egingo duten lana eraginkorra izateko, eta helburua lortzeko bermea handiagoa izateko, Udaltzaingoa duten herriek talde horietan parte hartzea beharrezkoa baita.
Udaltzaingoen erregistro bat sortzea proposatu du gaur goizean Arkautin EAEko Herrizaingo Sailak Udaltzaingoen Koordinaziorako Batzordeko bileran. Herrizaingo Sailak berak jakinarazi duenez, batzordeak Sailak aurkeztutako dekretuaren zirriborroa aztertzea erabaki du, EAEko udalen Udaltzaingoak osatzen dituzten kide guztien erregistroa izateko amoz. Batzorde horrek Herrizaingo Saileko lau kidek, Eudeleko 7 ordezkarik eta Polizian gehiengoa duen sindikatuko ordezkari batek osatzen dute. Erregistroaren sorrera 2006ko urtarriletik Juan Jose Olabarriak zuzentzen duen EAEko Udaltzaingoen Koordinaziorako Zuzendaritzaren ekimena da. Erakunde berri horren asmoa EAEko hamaika Udaltzaingoak Ertzaintzarekin koordinazioa estutzea eta elkarlana sustatzea da. Argazkian, Getxo udalerriko udaltzain bat Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun