Bihar eta etzi Getxoko XXIV. Haur Antzerki Jardunaldietako aktoreak izango dira ehunaka ume eta gazte
Asteburu honetan, bihar eta etzi, Getxoko XXIV. Haur Antzerki Jardunaldiak izango dira. Oraingo honetan, Getxo udalerriko hamar ikastetxetako ikaslek parte hartuko dute jarduera honetan. Bi egunetan zehar, jarduera hau antolatzen duen Getxoko Ume Antzerkia Bultzatzeko Elkarteko (GUABE) tailerren ikasleek ikasturtean zehar ikasitakoa erakutsiko dute jendaurrean, sarrera doakoa izango dela. Oholtzara igoko diren ikasleak Zubileta, Gobela eta Geroa ikastoletako, Fadura, Getxo I., Artaza-Romo eta Larrañazubi institutuetako, Romo, Andra Mari, San Ignacio eta Zabala eskoletako Lehen Hezkuntzako 3., 4., 5. eta 6. mailako eta Bigarren Hezkuntzako 1. eta 2. mailakoak dira. Bertako ikastetxeen egoera soziolinguistikoa islatuz, euskarazko eta gaztelaniazko lanak antzeztuko dituzte ikasleek. Argazkian, Zubiletako 4. mailako ikasle batzuk antzerki tailerrean / Zubileta.
Gaztetxoek lan handia egin dute asteburuan taularatuko dituzten antzezlanak idatzi edota moldatzeko, dekoratuak eta jantziak diseinatzeko. Larunbatean, antzezkizunak 17:00etan hasiko dira Algortako Getxo Antzokian. Igandean, berriz, goizeko 11:30ean eta arratsaldeko 5:00etan emanaldiak izango dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun