Halaber, kontuan hartu beharra dago Getxoko kultur ondare gisa duen Babes Erregimenaren barnean (Kultura Sailaren 89/2001 dekretua) “babes-zona” gisa sailkatzen dela, besteak beste, Arriluzetik Abasotara doan kostaldeko hiri-zati osoa, duen interes historiko-kulturalagatik. Halaber, “babes berezi” gisa sailkatzen du Ereaga Kaia kalea; hots, lanak egin nahi diren lekua. Honen arabera, aipatu lanak ezin dira, inola ere, burutu, Bizkaiko Foru Aldundiaren Kultura Sailaren aldeko txostenik gabe. Eta itxura denez, Udalak ez du txosten hori tramitatu. Horren arabera, eta Kultur Ondarearen Legearen arabera, lanak egingo balira guztiz ilegalak izango lirateke. Getxo Biziak egoera horren berri eman die Getxoko Udalari, Bizkaiko Foru Aldundiari eta Eusko Jaurlaritzari, bai eta jarraitu beharreko prozeduran egon litezkeen hutsuneei buruz galdetu.
Horregatik guztiagatik, Getxo Biziak aipatu lanak ez hasteko eskatzen du, berriz ere, bide horretan egin beharreko egokitzapena jendaurrean eztabaidatu ahal izateko. Horrela, itsasoa porlanez beteko ez duen eta gure ondare historikoa gordeko duen alternatiba bat landu ahal izango da.
Getxo Bizia
Ereagatik Portu Zaharrera doan bidea kultur ondare gisa sailkatuta dagoela oroitarazten du Getxo Bizia plataformak. Izan ere, Ereagatik Portu Zaharrera doan bidea zabaldu egin nahi du Getxoko Udalak, itsasoari lau metroko tartea kenduta, 305 metrotan zehar. Horrela, oraingo nasa guztiz estalita geratuko litzateke. Lanen esleipena eginda dago jadanik, eta uda honetan hastea aurreikusi du Udalak. Getxo Biziak jendaurrean salatu du, jadanik, Udalak lan hauek egiteko erabii duen prozedura: legealdiko obrarik handiena izan arren (2 milioi eurotik gora), ez da jendaurreko agerpenik egin, ez da Udaleko osoko bilkuratik pasatu, eta ez da galdapenak egiteko aukerarik eman; proiektua, Getxoko Hiri Antolaketarako Plangintza Orokorrak (HAPO) bide horretarako aurreikusten duenaren aurka doa; gure herriko kostaldeko zati bat estaliko duen arren, ez da ingurugiro-txostenik egin. Halaber, ez da kontuan hartu zati hori babestuta agertzen dela hasiera batean onartutako EAEko Itsasertza Babestu eta Antolatzeko Lurraldearen Arloko Planean. Argazkian, Josu Amezaga Getxo Biziako hautetsia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun