Neguriko ertzain-etxeko polizia agenteek 31 urteko emakumezko bat atxilotu zuten astelehen arratsaldean, neskame ziharduen zenbait etxetan bitxiak lapurtzea leporatuta, Eusko Jaurlaritzako Herrizaingo Sailak jakinarazitakoaren arabera. Ostutako bitxiek (eraztunak eta lepokoak, besteak beste) hiru mila euro inguruko balioa omen dute. Herenegun (astelehena) jarritako salaketaren arabera, lapurretak aurtengo apirilean hasi ziren bata bestearen atzetik, Getxo udalerriko hiru etxebizitzatan –ez dute gehiago zehaztu– orduka lan egiteko emakume bat kontratatu eta hilabete gutxira.
Etxe horien jabeak familia berekoak zirenez, haien etxebizitzetan jazotzen ari ziren ebasketen eta etxeak garbitzen zituen pertsonaren artean lotura zegoela antzeman zuten, polizia iturrien arabera. Salaketan lapurtutakotzat jotako bitxien artean eraztun bi (horietako batek 2.300 euro inguruko balioa du), kate bat eta perlazko lepoko bat zeuden. Gertakarien berri izan bezain laster, ustezko lapurra (T.L.M.S. 31 urteko emakumezkoa) atxilotu zuen Ertzaintzak. Urte hasieran, udalerrian bertan jazotako antzeko hainbat gertaeratan nahasita dago atxilotua, Herrizaingo Sailaren hitzetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun