Elkarteen proposamenak baztertuta, jaietan txosna jartzeko deialdia egin du Getxoko Udalak

Getxoko Udalak kultur eta kirol elkarteek udalerriko jai nagusietan txosnaren bat eska dezaten deialdia argitaratu du udal webgunean. Dekretuaren arabera, Algortan, Itzubaltzeta / Erromon eta Portu Zaharrean iazko txosna kopuru bera izango da elkarteentzat: hurrenez hurren, hiru txosna handi, lau txosna txiki eta hiru txosna handi. Txosna handien kasuan bina talde izango dira bakoitzean. Deialdia ekainaren 23ra arte zabalik izango da eta bertara aurkeztu ahal izango dira Getxoko Elkarteen Udal Errejistroan 2006ko apirilaren 1a baino lehen izena emanda zeukatenak. Iaz hiru tokiko jai batzordeek eta txosna eskaria egin zuten 26 taldeetatik 22k Guzman Aranaga kultur zinegotziari egin zizkioten eskaera gehienak baztertu ditu dekretu berriak, hala nola txosna bana gehiago jartzearena, dekretua ekaina baino lehen kaleratzearena, elkarteek jaiei egiten dieten aportazioa kontuan hartzearena eta elkarteak beraiena ez den herrietara ez mugitzearena. Oraindik ikusteke dago Udalak beste aldarrikapen batzuk beteko dituen, pasa den hiru urteko txosna eskaera egin dutenei dekretua helaraztearena eta "Getxoberri"n argitaratzearena kasu. 25 taldek iaz egindako eskaeretatik bakarra bete du Udalak oraingoz: dekretua udal webgunean argitaratzearena.