Bart eroritako tximista batek kalteak eragin ditu Metro Bilbaoko sistema informatikoan. Hortaz, trenen zirkulazioa asko moteldu da, errail aldaketak eskuz egiten ari direlako. Bide aldaketak automatikoki egiten dira normalean, baina matxuraren ondorioz, zentral nagusira telefonoz deitu behar dute geltokietako arduradunak, aldaketak egin behar dituztela ohartaraziz. Oraingoz ez da etenaldirik egon Etxebarri eta Plentzia arteko linean, baina Aiboa, Algorta, Bidezabal eta Berangoko geltokietan arazo handiak izan dituzte, Metro Bilbaoko arduradunek jakinarazi dutenez.
10 minutuko atzerapenak
Trenen ohiko zirkulazioa bermatzeko ezinbestekoak diren hainbat pieza erabili ezinik gelditu dira eta Madrilgo enpresa bati eskatu behar izan dizkiote, beraz, lau ordu inguru itxaron beharko dituzte heldu arte. Atzerapenak 10 minutu ingurukoak izan dira eta hainbat geltokietako adierazle elektroniko geldituta daudela adierazi dute.
Bart izandako ekaitz trumoitsuak kalteak sortu zituen Algortako bi eraikinetan eta metroan. Kasune kaleko 62. zenbakiko eraikin baten aurka jo zuen tximista batek, 23:30ean, eta inork min hartu ez bazuen ere lehen solairuko gas instalazioan kalteak eragin zituen, Eusko Jaurlaritzako Herrizaingo Sailak jakinarazi duenez. Dena den, eraikin horretako bizilagunak atera zituzten, suhiltzaileek sua mendean hartu arte. Beste tximista bat Telletxe kaleko eraikin bateko teilatuan jo zuen eta hirugarren tximista batek metroko sistema informatikoan kalteak eragin zituen eta, ondorioz, 10 minutuko atzerapenak izan dira goiz osoan zehar. Argazkian, suhiltzaile bat Kasune kaleko etxebizitzan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun