Goizeko seiak aldera, ibilgailu batek 21 eta 32 urteko Erandioko bizilagun bi (I.M.S. eta I.U.M.) harrapatu zituen BI-737 errepidean, Erandio Goikoa auzoan. Gurutzetako Ospitalera eraman zituzten zauritutako lagun biak, horietako bat larri. Istripua jazo ondoren, ibilgailuak alde egin zuen, polizia iturriek emandako datuen arabera eta, hortaz, gertatutakoa argitzeko eta gidaria identifikatzeko ikerketa lanak abiatu zituen Ertzaintzak.
Burututako ikerketak oinarri hartuta, 14:45ak aldera, Bizkaiko Trafiko Unitateko agenteek 23 urteko gazte bat atxilotu dute (Derioko bizilaguna), errepideko segurtasunaren aurkako delitua egitea, ausarkeriaz gidatzea eta salaketa faltsua jartzea leporatuta, aipatutako istripuan ustez zerikusia izan baitzuen. Atxilotuak ibilgailua ostu ziotela salatu zuen goizean Ertzaintzaren aurrean, ezbeharra eragin zuen ibilgailua, hain zuzen ere.
Erandio Goikoako jaietatik bueltan, bi lagun harrapatu zituen atzo ibilgailu batek
Gazte bi zauritu ziren, horietako bat larri, atzo (igandea) goizaldean BI-737 errepidean (Erandio) ibilgailu batek harrapatu ostean. Eusko Jaurlaritzako Herrizaingo Sailak jakinarazitakoaren arabera, Istripua eragin zuen gidariak ihes egin eta arratsaldean atxilotu zuen Ertzaintzak, errepideko segurtasunaren aurkako delitua egitea, ausarkeriaz gidatzea eta salaketa faltsua jartzea egotzita. Erandio Goikoako jaietatik bueltan zetozen bi lagunak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun