Galder Bilbao “Txapi”, kale erasoak, Polizia eta herri batzarrak dira egunotako berri politikoak

UKBERRI elkarteak Leioako San Juan jaietako hainbat ikuskizun eta txosnagunea antolatzen ibili da azken astean, Maritxu Teilagorri jai herrikoien aldeko elkargunearen barnean. Hori dela eta, aukera gutxi izan dugu egunerokotasunari heltzeko. Baina, badaezpada ere, inor informaziorik gabe ez gelditzeko, azken egunetako albisteak laburbilduko ditugu. Galder Bilbao “Txapi” Algortako preso gaztea pasa den ostiralean irten zen Curtis espetxetik, 30.000 euroko fidantza ordainduta eta, epaiketa burutu gabe, hiru urte kartzelan egon ostean. Larunbateko ordu txikietan heldu zen eskualdera, eta Leioako gasolindegian lehen harrera egin eta gero, lagunek berarekin bildu ziren Algortako Amnistia tabernan. Politikarekin jarraituz, ekainaren 23an bildu zen Getxo udalerriko Ezker Batua Berdeen Tokiko Batzarra eta Espainiako Alderdien Legeari esker zinegotzia den Aitor Lafuenteri babesa emateaz gain, Euskal Herriko eta Kataluniako egoera politikoak aztertu zituzten. Beste bilera batzuk ez ziren hain lasaitasun handiz burutu. Izan ere, atzo Algortan eginiko “Guztiok Gara Giltza” prozesurako batzarrean parte hartze poliziala salatu dute. Bestalde, ostiralean, ekainak 23, atxiloketen eta errepresioaren aurkako mobilizazioak izan ziren eskualdean. Besteak beste, 100 pertsona izan ziren Algortan eta 43 Leioan. Era berean, 75 lagunek “konponbidea orain” aldarrikatu zuten Urdulizen. Egun berean, baina bost ordu lehenago, ezezagun batzuek su eman zieten Algortako Andres Cortina kaleko hainbat edukiontziei, kalte txikiak eta Getxoko alkatearen eta PPren gaitzespena eragiten. Egun bat lehenago Gorlizko Andra Mari kaleko BBVAko kutxazaini eraso egin zioten, geroago Eusko jaurlaritzak eta Ezker Batuak salatu zutela. Argazkia: Etengabe