Jazz Kamikazeri dagokionez, 2005eko hasieran sortu zen, Danimarkako gazte talentuentzako Young Jazz lehiaketan berehalako arrakasta lortzeko asmotan. Izan ere, lehen parte-hartzean irabazi zuten eta, jarraian, Young Nordic Jazz Comets lehiaketan lehenengo saria eskuratu zuten. Boskoteak jazz akustiko modernoa jotzen du, besteak beste, E.G. Joshua Redman, Chris Potter eta Dave Hollanden eraginarekin. Hala ere, inspirazio-iturri zehatzik ez du, oso soinu berezia baitu.
Sariak
Talde Lehiaketaren irabazleek 3.000 euro jasoko dituzte eta CD bat grabatuko dute. Gainera, talde irabazleak gaur joko da berriz Algortako Biotz Alai plazan, 21,30etan, Billy Cobham-Didier Lockwood String Quartet taldearen aurretik. Halaber, irabazleek Hoeilaarteko (Belgika) eta Ibizako (Espainia) jazzaldietan parte hartuko dute, Getxoko Jazzaldiak hauekin duen lankidetza-hitzarmena dela medio.
Bestalde, bigarren saria lortu duen taldeak 1.200 euro jasoko ditu, eta bakarlaririk onenak 600 euro. Publikoen sariei dagokienez, irabazleek oroitzapenezko garaikurrak jasoko dituzte.
Magnus Mehl Quintet talde alemaniarrak irabazi du Getxoko Jazzaldiko Talde Lehiaketa
Alemaniako Magnus Mehl Quintet (argazkian) taldeak irabazi du Getxoko XXX. Europar Jazzaldiaren Talde Lehiaketa, eta Jazz Kamikaze boskote danimarkarrak eskuratu du bigarren saria eta Publikoaren Saria. Bakarlariei dagokienez, epaimahaiak Brice Moscardini Magnus Mehl Quinteteko tronpeta-jolea saritu du; publikoak, berriz, Marius Neset Jazz Kamikazeko saxofonista hautatu du. Antolatzaileek jakinarazi dutenez, Magnus Mehl Quintet taldea 2005eko udan sortu zuen Magnus Mehl saxofoi-joleak. Taldekide guztiek Koloniako kontserbatorioan ezagutu zuten elkar. Bandak berezko konbo kontzeptua garatu du eta indarrez eta freskotasunez egiten du jazza, jatorrizko piezen interpretazioa eta beren eragin musikal nagusien gaineko moldaketak uztartuz. Freskotasuna eta energia dira boskote honen musikaren ardatz nagusiak eta, hauek erabilita, talde-kontzeptu berri bat garatzeko asmoa dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun