Aukeraturiko artista guztiek dirua jaso eta euren obrak Bizkaian zehar erakusteko aukera izango dute. Era berean, 20 artista horien artean, hiruk sari bereziak lortu dituzte: 3.600 euro Lide Kaltzada gernikarrak, 2.700 euro Koldo Etxebarria lemoarrak eta 2.100 euro Valdepeñaseko (Ciudad Real) Carmelo Camachok.
Epaimahaia
Alfonso Gortazar pintoreak eta EHUko Arte Ederretako irakasleak, Jose Angel Lasa eskultoreak eta EHUko Arte Ederretako irakasleak, Pilar Mur Bizkaiko Foru Aldundiko Rekalde aretoko zuzendariak, Daniel Tamayo pintoreak eta EHUko Arte Ederretako irakasleak eta Javier Viar Bilboko Arte Eder Museoko zuzendariak osatu dute artistak aukeratzeko epaimahaia.
Urtea amaitu bitartean bisitatuko dituen hamar udalerrietatik, Uribe Kosta eskualdeari dagokionez, Gorlizko Eloisa Artaza kaleko aretoan baino ez da egongo ikusgai Ertibil 2006 erakusketa: joan den asteartean zabaldu zuten eta ostegunera (uztailak 13) arte izango da ikusgai. Bizkaiko Foru Aldundiko Kultur Sailak Arrigorriagan (ekainaren 20tik 30era) jarri zuen abian egungo artearen erakusketa ibiltaria. Ekimenaren helburua artista gazteak sustatzeko plataforma bihurtzea da. Gorlizetik igarota, Bilbo, Portugalete, Basauri, Gernika, Barakaldo, Zornotza, Muskiz eta Santurtzin ere izango da. Ertibil ekimenak 23 urte bete ditu aurten. Aurtengo edizioan, 20 artisten lanak erakutsiko ditu, Kepa Garraza berangoztarraren argazkia tartean; Aldundiak eginiko deialdira 131 artista aurkeztu ziran danetara, 146 obrarekin. Argazkian, lehenengo saria irabazi duen Lide Kaltzada gernikarraren lana.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun