Kasta umileneko Indiako emakumeak bere buruaren jabe izateko 9.300 euro bideratu ditu Berangok

Berangoko Udalak bere burua aski duen emakumeak izan daitezen laguntza emango die Indiako Dalit kastako berrogei emakumezkoei. Miren Dobaran Berangoko alkateak jakinarazi duenez, Berangok Vicente Ferrer Fundazioak burutzen duen heziketa ekimena 9.300 eurorekin diruz lagunduko du. Proiektu horretan lanbideren bat erakutsiko diete emakumeei, jarduera ekonomikoak egiteko ahalmena eskura ditzaten eta, horrezkero, diru sarrerak lortu eta beraien familiak egonkortu ditzaten, autoestimua handituz. Dobaranen esanetan, “dalit izatea dohakaitza da herri horretan, emakumeek oraindik ere okerrago dutela”, horregatik, “munduko txiroenen artean txirotasunak emakume aurpegia duelako” kolektibo horren aldeko apustua egin dute. Gainera “etorkizuneko apustua” dira emakumeak, “prestakuntza eta mentalitatea alabei transmitituko die. Bestalde, datorren urtean Indiakoa bezalako nazioarteko lankidetzako proiektuetara udal aurrekontuaren %0,7 bideratzeko asmoa du Berangoko Udal Gobernuak. Argazkian, dalit emakume bi etxea eta umeak zaintzen / Matteo Gianni.