Datorren ikasturtean testuliburuak doakoak izatea eskatuko du Getxoko PPk
2006ko uzt. 19a, 14:56
Datorren uztailaren 28an burutuko den Getxoko Udal Batzarrean 2006-2007 ikasturtetik aurrera ikasle getxoztarrek doako testu liburuek izan ditzaten mozioa aurkeztuko du Alderdi Popularrak. Getxoko PPren proposamenenak derrigorrezko hezkuntzan liburuen doakotasuna ezar dezan Eusko Jaurlaritzarengana zuzentzea eskatzen dio Getxoko Udalari, “Eusko Legebiltzarrean erdietsitako akordioak betez”. Era berean, mozioak Bizkaiko Foru Aldundiarekin hitzarmen bat sinatzea proposatzen du, doakotasuna lortu arte Haur Hezkuntzako 2. zikloko, Lehen Hezkuntzako eta DBHko ikasleen derrigorrezko testuliburuen erosketa finantzatzeko. PPren esanetan, dagoeneko Arabako Foru Aldundiak eta Gasteizko Udalak horrelako plangintzak dituzte.Getxoko PPren ustez, “asko dira Getxon oporren bueltan testuliburuen gehiegizko prezioa jasan behar dituzten ikasle zein familiak”. Gainera, popularrek kexu dira “familia berean gero eta ikasle gehiago egonda orduan eta handiago delako gastua, liburuak maiztasun handiz berritzen baitira eta gutxitan berrerabil ditzakeelako anai-arrebaren batek”. PPk espero du “Getxoko beste alderdien babesa eskuratzea, familia getxoztarrek arabarrek zein gasteiztarrek baino maila ekonomiko hobea dutenik ez baita frogatu, eta gure familiek 2006-2007 ikasturterako doako testuliburuak izateko beste eskubidea dutelako”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun