Getxoko Udal Batzarrean hartutako erabakiari jarraiki, Udal Gobernuak 144.814 euro gehiago bideratuko ditu udal hilerria zabaltzeko lanetara. Lan horiek eginda, hilerriak 604 nitxo eta 1.620 hezurtoki berri izango ditu. Iñaki Zarraoa Getxoko alkateak esan duenez, lanak guztira 919.000 euroko aurrekontua izango dute. “Udal hilerria barrutik handitzeko aukerak hasiera batean uste baino handiagoak dira, eta horregatik erabaki dugu lan hauek egitea. Lehiaketa bitartez emango ditugu”. Egitasmoa 2005eko amaieraz geroztik dago idatzita. Etorkizunean, hezurtoki berriei esker, “kuartelak”, gaur egun hezurrak lurperatuta dauden lur-zatiak, hilobi egingo dira. “Lur-zati horietan lurperatutako hezurrak aterako dira, hezurtoki berrietan ipiniko dira eta hortik aurrera hutsik geratzen diren “kuarteletan” hilobiak egingo dira”, gehitu du alkateak.
Hilerria zabaltzeko lan hauei esker ere, 15 edo 20 urtetarako behar beste leku geratuko da bertan, gaur egun eta etorkizunean Getxon bizi eta bizi izango den biztanle kopuruarentzako beste, kontuan hartuta Udal Gobernuak Getxo aldean eraiki nahi dituen 8.000 etxebizitzak. Gaur egun udal hilerrian 2.736 nitxo, 498 panteoi eta, bost sailetan banatutako hezurtoki nagusi bat daude.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun