Lafuenteri egindako ustezko mehatxuak tarteko, Portu Zaharreko jaietan hainbat txosna debekatzea eskatu du Getxoko Ezker Batuak
Algortako Portu Zaharreko jaietako txosna gunean Aitor Lafuente Getxoko EB-Berdeetako zinegotziaren aurkako kartel "mehatxugarriak" egon zirela salatu zuen atzo, prentsa ohar bidez, Iñaki Urkiza alderdi horretako bozeramaileak. Udal Gobernuko kide ere denak azaldutakoaren arabera, Lafuenteren argazkia ikusten zen horietan, "lapurra" hitza ondoan zuela. Halaber, "txosna horietako batzuetan zeudenek zinegotzia zerbitzatzeari uko egin" zutela gaineratu zuen Urkizak, gertaera "onartezintzat" joz. Getxoko Ezker Batuko bozeramailearen aburuz, "euren aukera ideologikoa defendatzeko eskubidea erabili nahi duten herritarren aurkako mehatxu politikoaren adibide argia" dira berak azaldutakoak. "Talde horiei fidantza itzuli ez –azken urteotan ez da erabili fidantzen sistema; isunak ezartzen ditu Udalak jaien ostean– eta datorren urtean txosna jartzeko debekua ezar diezaiela" eskatuko dio Getxoko Gobernu Batzordeari EBk, Urkizak iragarritakoaren arabera. Argazkian, ezkerretik eskuinera, Urkiza eta Lafuente / Ezkerti
Getxoko EBko bozeramailearen hitzetan, "ezin diegu baimen osoa eman horrelako jokabideei, gatazka baino ez baitute eragiten". Are gehiago, ETAk su-etena iragarri eta gero "bizi dugun une historikoan", "oraindik ere, gaur egungo testuinguruaz ohartzen ez diren ezker abertzaleko sektoreak egon badaudela" azpimarratu zuen Urkizak. "Ezin dira jaiak eta txosnak erabili pertsonek eskubide eta askatasunen aurka jotzeko", gaineratu zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun