Getxoko PPk “berriz ere zentzuz jokatzeko” eskatu dio Zapaterori

Getxoko PPko presidentea den Marisa Arrueren iritziz, atzo Algortan txanodun talde batek autobus bati su ematen saiatu izanak “pixkanaka kale bortxakeria eta larderia berrindartzen ari direla” erakusten du. Horregatik eraso saiakera gaitzetsi ostean, Arrue Espainiako Gobernuari zuzendu zaio “hau bezalako gertaerak kontuan hartzeko eta terrorismoaren kontrako borrokan berriz ere zentzuz jokatzeko eta espainiarrei gezur gehiago ez botatzeko” eskatzeko. Era berean, Arruek azpimarratu du zaurituta irten den bidaiariaren “balentria” txanodunei aurre egiteagatik. Leopoldo Barreda Gasteizko Legebiltzarkide popularraren arabera, berriz, “ETAk armak erabiltzeari inoiz ez diola uko egin, inoiz ez duela esan desegingo dela eta gizarte demokratikoan era ez-legitimoan eragiteari inoiz ez duela baztertu” frogatzen du atzoko ekintzak.