Kostaldean itsasoari lekua kentzen hasi dira, autoak aurrerantzean ere Portu Zaharreraino gau eta egun oztoporik gabe iristeko. Berde kolorea nagusi duen panfletoa banatu digute postontzi guztietan, baina egunerokoan porlan grisez estaltzen dituzte zelai berdeak eta itsaso urdina.
Beste mundu bat posible da, jakina baietz! Baina hitz eta folklore hutsez aldaketarik ez da izango, berean jarraituko baitute porlanaren nagusiek eta era guztietako espekulatzaile profesionalek. Hitz hutsak baino, ekintza eraginkorrak behar ditu munduak. Hemen eta orain hasiko gara! Bizikletaz Getxoko Udalaren plan, proiektu eta lan suntsitzaileen aurka eginez, gure errealitate hurbiletik hasita mundua aldatzen hasiko gara. Zatoz gurekin!
Galdaretxe bizirik! Lanak gelditu!
Deialdia: bizikletada irailaren 22an, ostirala
18:00etan Algortako Telletxe plazan
18:25etan Getxoko probalekuan
19:00etan Itzubaltzeta / Erromoko Itzubaltzeta gaztetxean
19:30etan Portu Zaharrean
LZP eta HAPO hauei, ez!
Hondeamakinei metro karratu bat gehiago ere ez!
Galdaretxen lanak gelditu!
Hormigoizko horma berriari ez! Singerak itsasoari itzuli!
Kostaldea eta landa eremuak bizirik!
Uribe Kosta Bizirik
Galdaretxeko lanen eta hirigintza planen aurkako bizikletada izango da arratsaldean
Irailaren 22an Europako hainbat hiritan autorik gabeko eguna ospatzen da, auto pribatua aire kutsadura eta aldaketa klimatikoaren eragile nagusietako bat dela gogoratzeko eta garraio kolektiboa ez ezik motorrik gabeko garraioa ere bultzatzeko. Getxoko Udalak ere “Mugikortasun eramangarriaren astea” antolatu du, zinema, jokoak, paseoa bizikletaz eta bestelako jarduerak tartean direlarik. Folklorismo hutsa! Udalak irailaren 17an eta 22an trafiko mozketak egiten ditu Algorta eta Areetako hiriguneetan eta autoaren erabilera murrizteko dei egiten digu, baina aldi berean Getxo kale eta errepide berriez bete nahi dute, egun behiak hausnarketan patxada ederrean dauden larreak porlanez bete motordun ibilgailuen burrunbak nagusitu daitezen. Irudian, Galdaretxe haitza lanak hasi baino lehen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun