Eguerdi aldera hartu dute Ereagako hondartza Alcala de Henares, Gasteiz eta Sevillatik etorritako dozenaka militar ibilgailuk eta ehunaka soldaduk, armak agerian zituztela. Guztira, Espainiako Armadako 800 bat kide dabil egunotan maniobra militarrak egiten Euskal Herrian. Halabaina, paraxutisten brigadako bozeramaileak adierazitakoaren arabera, Algortan "ez zeuden guztiak". Itxura denez, gaur izango dute azkeneko saioa Mungiako Soietxe kuartelan.
Bi iritzi aurrez aurre
Hasiera hasieratik igarri zitekeen zein zegoen armadaren alde eta zein kontra: batzuk Espainiako banderak aldean eta besteak ikurrinak, batzuk txaloka eta besteak txistuka, batzuk "VIva España" eta besteak "Alde hemendik" oihuka, batzuk musikaren doinuekin giro alaiean eta besteak Guardia Zibilez josita... Paraxutistak hondartzara heltzen ziren heinean, berriz, hiru pankarta zabalduz joan dira maniobra militarren aurka zeudenak: "Alde hemendik", "Alde hemendik, utzi bakean" eta "Menos militares, mas gastos sociales" (Militar gutxiago, gizartegintzan gastu gehiago), irakur zitekeen horietan, hurrenez hurren. Hala ere, egoerak ez du txarrera egin.
Halabaina, saioa amaitu eta gutxira egin dute tupust bi taldeek. Armadazaleetako batzuek soldaduei musuka eta argazkiak ateratzen zebiltzan bitartean, irainka eta tirabiraka hasi dira errepidean elkarren aurka eta, berehala inguratu da Guardia Zibila; maniobra militarren aurka zegoen gazteetako bat arrapatzen ere saiatu da agenteetako batek. Hala ere, armada aurkakoek soldadu eta guardia zibilak txistuka agurtuz amaitu da guztia.
Hiru baja
Ereagakoa bezalako maniobra militarrek "arriskurik ez" daukatela adierazi duen arren, Espainiako Armadako kamikoi batek arrapatuta, hiru soldadu zauritu direla baieztatu du paraxutisten brigadako bozeramaileak: bi larri daude eta batek zauri arinak ditu, Muxikan gertatutako istripuaren ondorioz.
Gaiaren inguruko berriak:
Espainiako Armada lurrez, itsasoz eta airez ari da Uribe Kostan (2006 Ira 28)
Espainiako Armadako "Primo de Rivera" paraxutisten brigadako bozeramaileak iragarritako "ikuskizunak" gatazka baino ez du eragin, gaur eguerdian, Algortako Ereagako hondartzan. Eduardo Andrade Getxoko PPko zinegotzia tartean zela, txaloka eta "Viva España" oihukatuz jaso dituzte soldaduak Igeretxe hotel aurrean batutako berrehun bat armadazalek, militar musika bandaren doinuei so zeudela. Bitartean, handik hogei metrora, dozenaka lagun elkartu dira gerrarien presentzia salatzeko. Uneoro Guardia Zibila inguruan zutela, "Alde hemendik, utzi bakean" irakur zitekeen pankarta zabaldu eta "Ez, ez, ez, ejerzitorik ez", "Fuera las fuerzas de ocupación" (Okupazio indarrak kanpora) eta "Ni se os quiere, ni se os necesita" (Ez zaituztegu nahi, ez zaituztegu behar) bezalako leloak oihukatuz eta txistuka hartu dituzte paraxutistak. Kazetariek ere ez dute lan erraza eduki: tartean, "Deia"ko erredaktorea jipoitzen saiatu da armadazaleetako bat eta Guardia Zibilak hainbat oztopo jarri dio UKBERRIko argazkilariari. Baina, ez dira komunikabideenak izan inguruan izan diren argazki eta bideo kamera bakarrak: militarrek, kalez jantzitako agenteek eta hainbatek, Andrade tartean zela, alde batera zein bestera hartu dituzte irudiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun