Berdintasun eta Gizarte Ekintza ez ezik, gainontzeko udal arloak ere hartuko ditu ostegun iluntzean onartutako planak. Besteak beste, bi atal izango ditu: hainbat ekintza aurrera eramatea, 2006ko iraila eta 2007ko maiatza artean, batetik; eta, horien balorazioa, 2007ko maiatzetik irailera, bestetik. Lortutako emaitzen arabera erabakiko dute hortik aurrera zelan jarraitu.
Ekimen ugari
Hizkera sexista ekidin aldera, udal langileak trebatu eta sentsibilizatzea; udal arloetan genero ikuspegia txertatzea; eta, dauden beharrizanak antzemateko, Itzartu emakume elkartearekin zein gainontzeko eragileekin elkarlanean aritzea dira, besteak beste, aurrikusten diren ekintzak. Guztietarako diru-partidak ere onartu egin ziren irailaren 28ko udal osoko bilkuran. Horretaz gain, Berdinsarea emakume eta gizonen berdintasunaren aldeko eta emakumeenganako indarkeriaren aurkako EAEko udalen sarean sartzea eskatuko du Sopelak.
Gizon eta Emakumeen Berdintasunerako Plana onartu zuen aho batez, irailaren 28ko osoko bilkuran, Sopelako udalbatzak. "Urteotan zehar jazo diren desberdintasun prozesuak aldatzea da helburu nagusia", Estibalitz Anaitua Uribe Kostako Mankomunitateko Berdintasun teknikariak adierazitakoaren arabera. Besteak beste, herritarren parte hartzea sustatzea da asmoa, politikari, teknikari eta gizarte eragileak batuko dituen foroa eratuz. "Planak eguneroko bizitzako esparru guztiak hartuko ditu: enplegua, osasuna, pertsonen arteko harremanak, etxeko lanen banaketa edota hirigintza planifikazioa. Izan ere, emakume eta gizonen arteko desberdintasuna ematen den esparru ugari dago eta bi sexuen arteko benetako berdintasuna lortzea da gure lana", azaldu zuen Anaituak. Sopelan bezala, berezko plan estrategikoa onartu eta garatu beharko du Uribe Kostako Mankomunitatea osatzen duen udalerri bakoitzak. Argazkian, aurreko osoko bilkura bateko irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun