Albiste honen alboan agertzen den irudiari begiratzearekin konformatu beharko dira asteburu honetan ostrak ahoratzeko gogoa zutenek. Izan ere, Getxoko Udaleko Euskara Zerbitzuak jakinarazi duenez, horien ordez, gazta eta foiea izango dira larunbat honetan, Iparra Galdu Gabe jardunaldien barruan antolatutako dastaketan. Behintzat, ekitaldiaren ordua eta lekua ez da aldatuko: Algortako Telletxe plazan, 11:00etatik 14:30era. Halaber, kale animazioa izango da bertan Burrunka taldearen eskutik, 12:00etako eta 18:00etako saiotan.
Iparra Galdu Gabe jardunaldiei amaiera emateko, berriz, dantzak, kantak, musikak, antzerkia eta ipuinak uztartzen dituen Batek Mila ikuskizuna antolatu du iganderako, urriak 8, Getxoko Udaleko Euskara Zerbitzuak, Lapurdi, Zuberoa eta Nafarroa Behereko Euskal Kultur Erakundearekin elkarlanean. Ikuskizunean, Ballet Biarritz konpainiak, Baionako Musika Kontserbatorioak, Beñat Achiary kantariak eta Akitaniako eta Baionako Eszena Nazionalak hartzen dute parte. Arratsaldeko 7etatik aurrera izango da Algortako Getxo Antzokian. Sarreren prezioa 6 eurokoa da (5 euro, aurretik Algortako kultur aretoan edo BBKren kutxazainetan erosten bada).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun