“Zergatik ‘Kliska’?” artikulua “Kliska”n:
Kaixo, begietara heldu zaizun kliska hau Egizuk eta Bizarra Lepoanek egindako keinua duzu, asmoz betetako keinua. Batetik, Getxon euskaraz antolatzen diren ekitaldiak iragarri nahi ditugu; horrez gain, apurka-apurka, gure kliska Getxoko euskaldun guztion begietara heltzea nahi genuke. Bestetik, ordenagailu eta interneti buruzko informazio praktikoa eskainiko dizugu. Laugarrenik, eguneroko bizitzan euskaraz non egin dezakezun azpimarratzen ahaleginduko gara. Azkenik eta beste modu batera esanda, hilero egingo dizugu konplizitate kliska hau. Gu ere adi ibiliko gara! Harpidetzeko bidaliguzu mezua: info.kliska[abildua]gmail.com.
Egizu Getxo Euskaldun! eta Bizarra Lepoan Getxoko euskara elkarteek “Kliska” informazio orriaren lehenengo zenbakia kaleratu zuten atzo. Konplizitatean oinarritutako komunikazio ekimen berri honen bidez, Getxo udalerriko euskaldun guztiei egunerokoan euskaraz jardun ahal izateko erraztasunak eman nahi dizkiete euskalduntzen ari direnen eta euskaldunen elkarteek. Lehenengo ale honetan “Kliska”ren zergatia, Egizuren ikasturte berriak ekartzen duena, agenda, Leire eta Aitor berbalagunei egindako elkarrizketa, Xuxen zuzentzaile ortografikoa eta Asier Amezagaren iritzi artikulua aurkituko ditugu. “Kliska” paperean zein sarean kaleratu dute eta info.kliska[abildua]gmail.com posta elektronikora idatziz harpidetza egin daiteke. Argazkian, Egizuko panpina bat sostengatzen duen “Kliska” aleari so.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun