Bilborako prestatutako eskaintzan berriz, Madrilgo Ajo & Mastretta poetagile eta musikari ezagunek prestatutako “Streptease cardiovascular” kontzertu berezi eta ausartak irekiko du programazioa Bilborock-en eskainiko duten emanaldiarekin. Urriaren 25ean izango da hori, arratsaldeko 8.00etan eta atari ezin hobea izango da asteburu horretan bertan hasiko den BAD Bilbao Antzerki dantza jaialdirako. EHUk kolaborazio zuzena izango du arten BAD jaialdiarekin, Bilboeszenarako Teatro Zero-k prestatu duen workshop eta emanaldia lagundu baititu. Hurrengo astetan, Pikor Teatroren “Zapaldu Marra” gazteei zuzendutako antzerkia edo “Young Talent Show”en kontzertua izango dira Sarrikon, Ekonomia eta Enpresa Zientzien Fakultateko Aretoan, azken honetan Txuma Murugarren izango dutelarik ondoan bikote hau osatzen duten Audience taldeko bi lagunek. Bilborocken, berriz, antzerkia izango da ikusgai nagusia hurrengo emanaldietan, hala nola, Pok taldearen “Ongi ibili“ dibertigarria, “Yo mono libre”, Ricardo Jovenek egindako Kafkaren “Informe para una Academia”ren egokitzapena, “El txoko de la comedia”ren 5. edizioa, Mofa & Befa taldearen “Siempre lejos” ironia umoretsua edo Titzina Teatreren “Entrañas” lan indartsua ikusi ahal izango baitira.
Emanaldi hauetara guztietara edonor joan ahal izango da eta sarrera doan izango da. Doan ere baina, kopuru mugatuta dagoelako, aurretik gonbidapena eskatuta, EHUk lagun dituen Musiketan zikloko kontzertuak, Farrabúren III. Flamenko jaialdia eta Bilboko Orkestra Sinfonikoaren emanaldi batzuk ere entzun ahalko dituzte EHUko kideek.
Kultur ikastaro eta tailerrak
Eta aisiarekin batera formazioak ere leku garrantzitsua izango du kultur eskaintza honetan, Bilbon zein Leioan ospatuko diren ikastaro eta kultur taldeen bidez. Aipatzekoak dira, besteak beste Antzerki eta Dantza taldeak, ikastaroak ematen eta obrak garatzen urteak daramatzatenak, jendaurrean ondo hitzegiteko edota modu sortzailean idazteko tailerrak, txotxongiloak egitekoak eta beste hainbat. Hala eta guztiz, ere aipamen berezia merezi dute aurten lehenengo aldiz egingo diren bi tailerrek: Bilboko Orkestra Sinfonikoarekin lankidetzan eskainiko den Musikaren ingurukoa bata, non hainbat adituk, egilek, zuzendarik eta interpretek parte hartuko duten, eta animazioko etxeko teknika buruzkoa bestea Arte Ederren Fakultateko Jose Maria Mateos eta Bego Vicario irakasleen eskutik. Ikastaro hauetan guztietan edozeinek parte hartu dezake, nahiz eta EHUko kideek lehentasuna izango duten. Argibide gehiagorako EHUren kultur bulegoetara edo www.ehu.es/kultura-bizkaia internet helbidera jo daiteke.
“Todos nacemos vascos” antzezlanak Leioako campuseko kultur programazio berria abiatuko du
Euskal Herriko Unibertsitateko Erandio eta Leioako campusak ikasturte honetako kultur programazio berria estreinatuko du bihar bertan, asteazkena. Campuseko Areto Nagusiak goizeko 12etan hartuko du “Glu-Glu Produkzioak” taldeak Bizkaian egingo duen “Todos nacemos vascos” antzezlan arrakastatsuaren azken emanaldia. Euskal Herriko Unibertsitatean, ordea, aurtengo lehen kultur emanaldia baino ez da izango. Izan ere antzerki eta musika ekitaldi ugarik emango baitiote segida Erandio eta Leioako zein Bilboko campusetarako Bizkaiko Kultur Bulegoak prestatu duen programazioan. Hartara, Leioako Areto Nagusian Patxo Telleria eta Mikel Martinez bikotearen “Larru haizetara” antzerki lan bizi eta umoretsua, Vaiven taldearen “Nasdrovia Chejov” arrakastatsua, Eneko Oregiren “Ezin dut egia esan” lanaren moldaketa –Tarregako azken jaialdian berriki saritua gertatu dena- edo berriro taula gainetan biran dabilen “El florido pensil’” ospetsua ikusi ahal izango dira. Horiekin batera Rafa Ruedaren kantuak entzuteko aukera ere izango da Leioan bai eta Zinebi jaildira aurkeztutako euskal filmak ikusteko edo Arte Ederren Fakultatean ospatuko den AKME’06 jardunaldietako workshop, mintegi eta ekitaldietan parte hartzeko ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun