Orain dela hamar bat egun Bizkaiko Ezker Batua-Berdeak alderdiko prentsa bulegoak jakinarazi zuen bihar Algortako egoitzan errausketari buruzko mahai-ingurua egingo zutela. Getxoko Ezker Batua-Berdeak antolatutako ekitaldian Juan Lopez de Uralde Espainiako Greenpeaceko zuzendari exekutiboak, Jonathan Martinez EB-Berdeen Ingurumen Idazkaritzako arduradunak eta Ekologistak Martxan taldeko kide batek parte hartuko zutela iragarri zuten. Ezker Batuak kaleratutako karteletan, baina, Martinezen ordez Iñaki Urkiza Getxoko EBBko zinegotzia agertzen zen. Datu hori berrestu zuten astelehenean Getxo Gorriakoek, Getxoko EBBko kideek eratutako EBBren webgune “ez ofiziala”.
Beste mahai-inguru bat ordu berean
Atzo, inolako azalpenik gabe, Bizkaiko Ezker Batuko prentsa bulegoak jakinarazi zuen Ekologistak Martxan ez zirela izango errausketari buruzko eztabaidan. Lehenengo unean ekologisten hutsunea logikoa izan liteke bihar ordu berean Ekologistak Martxan “Nork nori zor? Zor ekologikoa” DVDa aurkeztu behar baitu. Baina, bere aldetik, Ekologistak Martxan taldekoek atzo jakinarazi zuten bihar beste mahai-inguru bat burutuko dutela Andramari elizaren ondoan dagoen Getxoko kultur gelan. “El proyecto de urbanización de Andramari de Getxo” titulupean egingo den hitzaldian Fernando Hevia arkitektoa eta Aralarreko burua 2003ko udal hauteskundeetan eta Jose Ramon Ortiz Ekologistak Martxan elkarteko batzorde juridiko kidea izango dira hizlariak. Mahai-inguruan, Getxoko egitasmoaren zein Bizkaiko kostaldeko herrietan martxan dauden beste proiektuen ezaugarriak ezagutzeko aukera emango da.
Ekologistak Martxan eta Ezker Batuaren arteko dibortzioa eta kontraprogramatzearen irudia garbiago emateko, Juan Lopez de Uralde Greenpeaceko zuzendari exekutiboaren egoera biguntzeko, edo beste arrazoiren bat tarteko, gaur goizean Bizkaiko Ezker Batuko prentsa bulegoak jakinarazi du bihar 17:00etan Urkiza eta Lopez de Uralde Algortako Ezker Batuko egoitzan batzartuko direla. EBBren oharraren arabera, Urkizak Getxon 8.500 etxebizitza, tartean 5.500 babestutakoak, eraikitzeko proiektuaren berri emango dio Lopez de Uralderi.
Getxoko urbanizazio proiektu berriak aurrez aurre jarri ditu Ezker Batua eta Ekologistak Martxan
Alderdi federalistak aurreko egunotan iragarri ez bezala, Getxoko Ekologistak Martxan elkartea ez da egongo bihar Getxoko Ezker Batua-Berdeek Algortan 19:30etarako antolatutako errausketaren kontrako mahai-inguruan. Ez joatea gutxi balitz, mugimendu ekologistak beste hitzaldi bat antolatu du ordu berean Getxon, herri horretako zein Bizkaiko kostaldeko urbanizazio proiektuari buruz. Ezker Batua Berdeak eta Ekologistak Martxan taldeen arteko gatazka erdian harrapatu du Juan Lopez de Uralde Espainiako Greenpeaceko zuzendari exekutiboa. Hori dela eta, errausketari buruzko hitzaldia eman baino ordu batzuk lehenago Iñaki Urkiza EBBko zinegotzia eta Lopez de Uralde batzarra egingo dute, hain zuzen ere, Getxoko urbanizazio proiektuari buruz mintzatzeko. Argazkian, gizon bat Getxoko urbanizazio proiektuari eta Bizkaiko Aldizkari Ofizialaren arabera botako diren etxeen argazkiei so.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun