Arriskuak ekidituz
Kantauri itsasoari begirako ekitaldia 11etan hasi behar bazen ere, antolakuntzak ordubete atzeratu du dena, bestela marea behe-behean egongo zelako surflariak uretara botatzeko orduan. Inguruak dituen haitzak eta Galdaretxen egiten ari diren lanek sor zitezkeen arriskuak gutxitu nahi izan dituzte horrela.
Eguerdian, Portu Zaharreko eskailerak jaitsi dituzte, arrantzalez jantzita, Itsasoruntz ekimeneko hainbat lagun eskuetan sare bat sostengatzen zutela. Arrainak beharrean, ekimeneko ikurrak eta Uribe Kostako 33 preso politikoen erretratuak eraman dituzte porturaino. Presoei agurra dantzatu ostean, saretik askatu dituzte presoak, Kantauri itsasoren babespean jarriz. Geroago, preso ohi batek eta Peña Txuri surf eskola kide batek manifestua irakurri dute euskaraz zein gazteleraz.
Ondoren, taldeka antolatu dituzte surflariak. Gorria, konpromisoaren kolorea, egoki diete, kamiseta banaz, eskarmentu handiko surflariei. Berdea, esperantza, ohola gainean hainbatetan igo direnei. Azkenik, zuria, bakea eta justiziaren kolorea, jarri diete noizbait surfeatu dutenei zein gaur lehenengo aldiz taula esku artean hartu dutenei. Parte hartzea hain arrakastatsua izanik, surflarien erdia elastiko barik gelditu da, nahiz eta neopreno trajeak eta oholak guztientzat egon diren, hainbat jendek bereak izan ezik beste batzuk ekarrita.
Gezia eta borobila
Berde zein zuridunek ikastaro azkar bat jaso ondoren, gorridunek gezi-punta bat osatu dute itsasoan jendearen txalo eta presoen aldeko oihuen artean. Geroago, neofitoak batu dira geziaren atzekaldea egiteko. Horrela, Itsasoruntz ekimeneko ikurra uretan osatu dute. Horren ostean, Hawai uharteetako bizilagunengandik mundu osoko surflariek ikasi eta hartutako hildakoak eta ez daudenak omentzeko ohitura bat ekarri dute gurera: eskuak helduta borobila osatu dute surflariek. Geroago olatuak egin dituzte eta amaitu dute ur-ikuskizuna portura zuzenduz. Bertan, euskal presoak etxeratzeko zein amnistiaren aldeko oihuen eta txalo zaparrada ederraren artean jaso dituzte. Surflariak ere pozik irten dira, nahiz eta batzuek neke-neke eginda egon. Indarrak batzeko luntxa izan dute eta ondoren. Xabier Amuriza, Xabi Paya, Arrate Illaro, Galder Bilbao “Txapi” eta Fredi Paya bertso saioa eskaini dute, besteak beste, euskal presoak, surflariak, Portu Zaharra edo bertan ezkontzako argazkiak ateratzen zebilen bikotea izan dituztela hizpide.
Itsasoruntz ekimenak botatako deiari erantzunez, 275 bat surflari batu dira Algortako Portu Zaharreko uretan presoen eskubideak eta etxeratzea aldarrikatzeko asmoz. Ekitaldia ikusten, txalotzen eta animatzen, berriz, ehunaka eta ehunaka pertsona egon dira. Antolatzaileek aitortu dute “balorazio ona” egin dutela eta “oso pozik” daudela herriak emandako erantzunarekin, aurreikuspen guztiak gainditu dituena: “parte hartzea espero genuena baino askoz handia izan da, nahiz eta ohiko erakunde batek ez deitu. Dena den, hau lehenengo pausu bat baino ez da, eta jakin behar dugu gaur sortutako harremanak bideratzen, jendartearen parte hartzea bake prozesuan bermatuta geldi dadin”. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun