“Erakustaldi hauek terrorismoaren apologia eta gu suntsitu nahi gaituzten gaizkile batzuen babesa baino ez dira. Demokraziaren arauak eta giza eskubideak betetzen ez dituztenak ezin dira zabal ibili gure herri eta hirietatik zigorgabetasun osoz” azpimarratu du Getxoko PPko presidentea.
Katua balego, errua
Kalearen egoera PPk babesten dituen baloreetatik hain urrun egotearen ardura leporatu dio Arruek azken garaietako “zilegitasunaren aldeko politikari”. Popularren arabera, politika horren ondorioz, “odolgaiztoek gure herri eta hirietako kale zein plazak bereganatu dituzte berriro ere”.
Horren guztiorren aurrean “zentzutasuna berreskuratzea” proposatu du Getxoko PPk, “bortxakeria eta gogortzaleen aurkako politika sendoetara bueltatuz”. Izan ere, Marisa Arrueren ustez, “garaia da amore ematen ari direnak beren akatsaz konturatzeko eta zuhurtasunera bueltatzeko, erradikalak gero eta sendoago eta harroputzago agertzen baitira eta euskal gizartea garaitzeko eta menperatzeko zein gure askatasuna akabatzeko asmoa izaten jarraitzen dute”.
Uribe Kostako eta nazioarte mailako 275 bat surflarik, Realeko eta Athleticeko hainbat jokalarik, kirol, kultur eta gizarte munduko dozenaka lagunek eta ehunaka eta ehunaka pertsonek babestu duten bake prozesuaren eta euskal presoen aldeko Itsasoruntz ekimenaren lana “terrorismoaren apologia” baino ez da Getxoko PPren ustez. Alderdi horretako zinegotzia den Marisa Arruek gaitzetsi egin du larunbatean herri ekimenak Algortako Portu Zaharrean buruturiko ekitaldia: “erradikalek gure kaleak bereganatzea onartezina da”. Zapatuko ekitaldiari buruzko bere interpretazioari jarraiki, “Portu Zaharra terrorista kartzelaratuen defentsan eta euren aldeko pankartez, kartelez, karpez eta txosnez inbaditzea ezin da zilegitu”. Horrelakoak esanda nahikoa ez eta “ez Getxon ez beste inon” gaineratu du Arruek. Argazkian, Arrue pozik, Algortako Jai Batzordeak ere “terrorismoaren apologia” egiten duela esateko uztailean egindako prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun