Udalaren beraren aurrekontua 95.935.584 eurokoa izango da. Haziko diren arloen artean dago Kultura (%34,5), Zarraoak azaldutakoaren arabera, “batez ere Getxo Antzoki berria egingo delako". "2007ko inbertsiorik handienetakoa da, 4 milioi eurotik gorakoa", gaineratu du. Hirigintzan, berriz, %14,2 handiagoa izango da inbertsioa, "zabortegia itxi beharrak sastarren eta zerbitzuaren gastua garestitu dituelako (zati bat 2006an ordaindu zen etagainontzekoa 2007an) eta inbertsioek ere gora egingo dutelako: Ereaga eta Portu Zaharra arteko bidea eta bidegorria, Salsidu eta Villamonteko arrapala mekanikoak, saneamendua...". Gizarte Zerbitzuen arloa ere hazi egingo da, %7,4 bat. Arlo honetako jardunik nagusiena Itzubaltzeta / Erromoko Nagusien Etxearen zaharberritze lanak izango dira, 2.837.000 euroko aurrekontuarekin (1.773.000 euro 2007an), alkateak aipatu duenez.
"Egitasmoen (giza larrialdietarako laguntzak, etxe laguntzarako zerbitzuak, berdintasun arloa, Gizarte Zerbitzuekin lankidetzan jarduten duten elkartentzako dirulaguntzak, familia eta nerabeak laguntzeko egitasmoa....) aurrekontua bataz beste %13,34 haziko da eta ondorioz Udalaren eginbehar soziala sendotu egingo da”, Iñaki Urkiza Gizarte Zerbitzuak, Hirigintza Planeamendua eta Etxebizitza zinegotziak aditzera eman duenez. Apur bat behera egiten duten arloak dira Udalburutza eta Ingurumena, "batez ere inbertsio gaiak direla-eta".
Erakunde autonomoak eta atletismo-pistaren zaharberritze lanak
Udal erakunde autonomoei dagokienez, 4.944.032 eurokoa izango da Jesusen Bihotza Zahar Etxearen aurrekontua; 2.255.197 eurokoa Andres Isasi Musika Eskolarena; eta 6.000.000 eurotik gorakoa Getxo Kirolak eta Kultur Etxearena. Azken hirurena %8 hazi da aurtengoaren aldean. Udal zahar etxearena, berriz, %1 haziko da "iaz baino inbertsio txikiagoa eta gestio hobeagoa daukalako".
Getxo Kirolen jardun nagusia atletismo-pistaren zaharberritzea izango da. “Bere garaian Euskal Autonomi Erkidegoko pistarik onenetakoa zen baina zoruan sortutako arazoak zirela-eta zahartu egin zen. Zaharberritu nahi dugu orain, Fadura puntako instalazioen artean jartzeko”, esan du Zarraoak. Gutxieneko aurrekontua miloi batekoa izango da.
Lau ardatz
Aurrekontu hauek lau ardatz nagusitan oinarritzen dira, udal arduradunen hitzetan: "gizarteratzea, bizikidetza eta elkartasuna; hiri garapen harmoniko eta jasangarria; kultur eta kirol bikaintasuna; eta gestioaren bikaintasuna".
Ostiraleko udalbatzarrean 2007rako aurrekontu egitasmoa aurkeztuko du Zarraoak
Datorren urteko inbertsioak "zorretan sartu eta udal ondarea saldu gabe" egingo ditu Getxoko Udalak, Iñaki Zarraoa alkateak gaur goizean emandako prentsaurrekoan aurreratutakoaren arabera. 2007ko aurrekontu bateratua 104.074.051 eurokoa izango da eta 2006koaren aldean %12,5 haziko da: %40 bat handituko dira inbertsioak eta aurrezpen garbia, hau da, zorretan sartu gabe egin ahal diren inbertsioen diru-kopurua, 20,5 milioi eurokoa izango da, udal agintariaren hitzetan. “Zorretan sartu eta udal ondarea saldu gabe ari gara inbertitzen. Ondare hori gerora behar beharrezkoa izango dugu enpresa eremua sortu, etxebizitza tasatuak eraiki eta garapen bidean diren guneetan kirol azpiegiturak egiteko, besteak beste”, zehaztu du Zarraoak. Azaldutakoaren arabera, "aurrezpen garbia etorri da, nagusiki, bi arrazoiengaitik: diru-sarrerek gora egin dute azken urteotan herrialdeak bizi duen oparotasunagatik eta Bizkaiko Foru Aldundiaren eta Udalaren beraren gestio eraginkorragatik, baita gastu arrunta (langileen gaineko gastuak) kontrolatzeko gai izan garelako ere”. Argazkian, Iñaki Zarraoa alkatea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun