Kanpaina horren bidez, "auto gidarien eta erakunde ofizialetako arduradunen kontzientzietan" eragin nahi dute antolatzaileek, "bizikletaz ibiltzeko espazioa sortu beharraz jabe daitezen". Horrela, errepide guztietan txirrindularien babeserako litzatekeen espazioa sortzea aldarrikatzen dute, 1,5 metro zabalerako "marra gorria" alegia.
Ibilbidea:
Larunbat honetan, goizeko 10:30an abiatuko da, Erandioko Udaletxe plazatik, txirrindularien eskubideen aldeko martxa; 13:00etik 13:30etara bitartean, Bilboko Arriaga antzokian amaitzeko. Honako hau izango da ibilbidea: Erandioko Udaletxeko plaza - Udondo - Leioa (Luis Bilbao Libano, Bulevard) - Artatzako errotonda - Txopoeta etorbidea - Fadura - Berango (Ricardo Ochoa plaza, metro geltokia, errotonda) - Algorta (errotonda, Sarrikobaso eta Bidezabal arteko bidegurutzea, Erredentore eliza) - Fadura - Txopoeta etorbidea - Ereaga ondoko bidegurutzea - Areeta - Axpe - Erandio - Elorrieta - San Inazio - Agirre Lehendakaria - Deustua - Euskalduna zubia - Bihotz Sakratua - Kale Nagusia - Plaza Eliptikoa - Plaza Zirkularra - Areatza - Arriaga plaza.
Erandioko Txirrindulari Elkarteak antolatuta, zikloturisten eskubideen aldeko martxaren zazpigarren edizioa egingo dute igande honetan, urriak 29, "Bizirik errespeta gaitzazu" lelopeko kanpainaren barruan. Goizeko 10:30ean emango zaio hasiera ibilbideari, hiru ordu beranduago Bilboko Arriaga plazan amaitzeko. Izan ere, Uribe Kostako eskualdeko hainbat udalerri (Erandio, Leioa, Getxo eta Berango) ez ezik, San Inazio, Deustua, Indautxu eta Zazpi Kaleak auzo bilbotarrak ere zeharkatuko ditu martxak. Ricardo Otxoa plazan (Berango) eta Axpen, berriz, omenaldia egingo diete istripuan hildako txirrindulariei. Izen-ematea irten baino ordu bete lehenago egin beharko da eta parte-hartzaile guztientzako egongo da oroigarria. Argazkian, "Bizirik errespeta gaitzazu" irakur daiteke ezkerreko txirrindulariak eskuetan duen petoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun