Hala ere, Zarraoak gogoratu zuen zuzenketak baliogabetzeko erabakia ez duela berak hartu, "kontu-hartzailearen erabakia" izan dela baizik. Zarraoak esan zuenez, “erraza da aurrekontu potoloak aurkeztea neurri gabeko diru-sarrerak handituz baina hori ez da benetakoa; gastua handitzen duen edozerk konpentsazioa izan behar du; bai beste gastu bat murriztuz, bai diru-sarrera berriak sartuz. Eta PPk ez du holakorik egin, askotan azaldu diogun arren. Hortaz, eurek badakite edozein zuzenketak teknikoki eta aurrekontuen aldetik justifikatu egin behar dutela”. Hala ere, popularrek ez zuten "horren argi" ikusten: alkatearen "jauntxokeriatzat" jo zuen erabakia Marisa Arrue Getxoko PPko bozermaileak.
Araudi "ez eraginkorra"
Kontu-hartzaileak ez ezik, Zarraoak berak ere aitortu zuen aurrekontuen eta zerga ordenantzen kasuetarako indarrean dagoen araudi organikoa ez dela eraginkorra, "egungoak osoko bilkuraren bezperara arte zuzenketak aurkeztea baimentzen duenez, ondoren arduradun teknikoei proposamenen bideragarritasuna egiaztatzen duten txostenik eskatzeko asitirik ez baitago". Horregatik, duela hilabete batzuk egutegia finkatu zen oposizioko alderdiei aurrekontuen zirriborroa ohi baino lehenago emateko eta zuzenketak aurkezteko epeak ezartzeko, "soseguz aztertu eta, hala balitz, akordioak lortzeko". “Oposizioko inork ez ditu aurkeztu zuzenketak epe horren barruan, baina Udal Batza baino 48 ordu lehenago PPk 106 zuzenketa partzial aurkeztu zituen, aurrekontuen zirriborroa duela hilabete bat eman zitzaien arren. Ez dute garaiz erantzun eta, horrez gain, teknikoki zuzena ez den moduan aurkeztu dituzte. Horregatik ez ditu kontu-hartzaileak onartu”, azaldu zuen alkateak.
Getxoko Udal Gobernua osatzen duten EAJ, EA eta Ezker Batua-Berdeak taldeen aldeko botuekin onartu ziren behin-behinean, joan den ostiralean (urriak 27), 2007ko aurrekontuak. PSE-EEko zinegotziak izan ziren kontra bozkatu zuten bakarrak. Izan ere, gai horren gaineko eztabaida hasi aurretik, areto nagusitik alde egin zuten Getxoko PPko ordezkariek, aurkeztutako 106 zuzenketatik 50 baliogabetu egin zizkietelako. “Gastuen hazkundea konpentsatzeko diru-sarrerarik ez dute zehaztu, eta hortaz, udal kontu-hartzailearen txostenaren arabera, ez dira bideragarriak eta ez dute Aurrekontuaren ganeko Foru Arauak eskatzen duen oreka printzipioa betetzen”, argudiatu zuen Iñaki Zarraoa alkateak. Azkenik, alegazioen bidea jorratuko duela adierazi zuen Getxo Bizia herri plataformak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun