Pasa den ostiralean, Areetako Xake plazaren ondoan egitekoa zen Etxerateko kontzentrazioa burutzeko batu ziren 25 lagunek Ertzaintzaren zabaltze ikusgarri baten lekukoak izan ziren. Areetako INEMen aurrean furgoneta zutela, dozena erdi bat ertzain inguratu zituzten euskal presoen aldeko kontzentrazioa. Bideokameraz eta pilota jaurtigailuez hornituta, poliziek alderdi anitzetatik atera zituzten irudiak, multzora apuntatzen zuten bitartean. Ondoko jolastokiko eta terrazetako hainbat neska-mutil saiatu ziren ertzainekin jolasten. Alferrik, baina, gurasoek ez baitzieten gehiegi hurbiltzen utzi, badaezpada. Etxerateko zaleek, berriz, pankarta zabaldu gabe, asanblada egin zuten bertan eta, azkenik, 20:45ean aldera, alde egin zuten. Haien iritziz, “ertzainak bero eta probokazioetan nor erori zain daude: kargatzeko gogoa daukate”, aurreko egunean ez zutelako herriko tabernen aldeko manifestazio baten kideak identifikatzea lortu. Ertzainek, Itzubaltzeta / Erromoko elizaraino jarraitu zituzten kontzentrazioan izandako kide batzuk. Ondoren, joan ziren. Argazkian, asteazkeneko identifikazio-saiakeraren irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun