Ertzaintzak BBKko haur-eskoletako arduradunei langilearen aurka jasotako salaketaren berri eman ostean, Algortako zentroa ikertu zuen hainbat egunez. Ondoren, asteartean goizean irakaslea atxilotu zuen eta polizien aurrean deklaratu eta gutxira askatu zuten, iluntzean. Ez epaitegiak eta ez Ertzaintzak ez dute jakinarazi zeintzuk diren irakasleari leporatzen zaizkien delituak, sumarioa sekretupean baitago.
Ertzaintzak Algortako haurtzaindegiko zuzendaria ere galdekatu egin du, lekuko gisa, “El Correo Español”ek aipatzen dituen “ikerketatik gertuko iturrien” arabera.
BBKko haurtzaindegi sareko arduradunek zuzenean eman diete inplikaturiko gurasoei ikerketaren berri. Era berean, nabarmendu dute inoiz ez dutela gurasoengandik inolako kexarik jaso zentroan jasotako arretari buruz eta bertako zuzendaritzak inoiz ez duela aurkitu haurtxoengan arreta eza edo tratu txarraren susmoa zabal zezakeen aztarnarik. Ikertutako irakasleari buruz, gogoratu dute orain dela urte asko lan egiten duela haurtzaindegian eta beragatik ez dela egon kexarik. Halere, bost umetxoak zaintzeko gaur hasi den ordezko langile bat kontratatu du BBKk eta auzian parte hartzeko asmoa iragarri du kutxak, ikerketa judizialen berri izateko.
Algortako haurtzaindegi bateko langile bat atxilotu dute haurtxoei tratu txarrak eman dizkielakoan
BBKko Gizartegintza arloak Algortan duen haur-eskolako hamabi langileetako bat atxilotu zuen asteartean Ertzaintzak, bere ardurapean zituen bost haurtxoren bat gaizki tratatu duelakoan. “El Correo Español”ek zabaldu duenez, langilea atxilotu eta ordu batzuetara askatu egin zuten, Getxoko Justizia Epaitegian gaur deklaratu beharko duela. Sumarioa sekretupean badago ere, Vocento taldeko hedabidearen arabera, salaketa irakaslearen lankide batek jarri omen zuen. Era berean, eta “El Correo Español”ek “baieztatu ezin izan” duen baina argitaratu duen zurrumurru baten harira, baliteke Ertzaintzak atxilotutako irakasleari ateratako bideo bat izatea non haurtxo bat astintzen ikusten zaion, baina ez dago inolako informazioa hori egia denik esateko. Bestalde, BBKk nabarmendu du langilea eskarmentu handiko irakaslea dela eta berak zaintzen zituen umeen gurasoek zein zentroko zuzendaritzak inoiz ez dutela berarenganako kexarik izan. Halere, orain gurasoak kezkatuta agertu dira. Argazkian, artxiboko irudi bat, inolako tratu txarrik jaso ez duen ume batena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun