Patxi Lopezek RNE irratiari egindako adierazpenetan, Frantzian lapurtutako pistolak, kale erasoak eta Guardia Zibilak Zarauzko Arrano herriko tabernan hainbat zinegotziri buruz atzemandako txostena nahastu zituen “bake prozesuko” oztopo gisa. “Nazkatzen hasiak gara ezker abertzaleak etxerako lanak egin beharrean demokrata orori erruak eta hordagoak botatzeaz”. Lopezek zehaztu zituen ezker abertzaleari jarritako “etxerako lan” horiek: “oztopo hauek ezabatzea eta pedagogia politikoa eta demokratikoa egitea” bere oinarri sozialean. “Politikan, hauteskundeetan eta erakundeetan parte hartu nahi badute bortxakeriatik behin betiko aldendu behar dira”, gaineratu zuen PSE-EEko idazkariak.
PPk erantzun indartsua eskatu du
Marisa Arrue Getxoko PPko presidentea, zinegotzia eta bozeramailea eta Espainiako kongresuko diputatuak erabateko gaitzespena egin zuen. Era berean, “erantzun indartsu eta eraginkor” baten hutsunea kritikatu zuen: “kale terrorismoaren aurka borrokatzeko tinkotasun demokratikoa berreskuratzea behar-beharrezkoa da. Gure askatasuna lapurtu eta gure demokrazia txikitzeko asmoa dutenekin ezin da epela izan”. Popularrak bere elkartasuna adierazi die kale erasoak izan diren zonaldeetako auzokideei, “ikaratuta daudelako”.
PPk egin bezala, Eusko Alkartasunak ere bere elkartasuna adierazi zien auzokideei eta kale erasoen “behin betiko desagerpena” eskatu zuen, “Euskal Herrian irekitako baketze eta normalizazio prozesuan aurrera egin ahal izateko”. Horrelako ekintzak euskal gizarteak duen itxaropena iluntzeko baino ez dutela balio adierazi eta prozesua “bide demokratiko eta baketsuen bidez bakarrik” igaro behar dela azpimarratu zuen EAk.
Ezker Batua Berdeak, berriz, ezker abertzalearengana zuzendu zen kale erasoak amai daitezen eska dezan, “normalizazio politikoa eta bake prozesuarekin” duen “konpromisoaren” erakustaldi gisa.
PP, PSE-EE, EB eta EAk gaitzetsi dituzte Algortan eta Getxon izandako kale erasoak
Astearte gauean Algortan eta Getxon egindako Correos-eko furgoneta bateen aurka eta BBKko kutxazain baten kontrako kale erasoak gaitzetsi dituzte PP, PSOE, EB eta EAk. Herrizaingo Sailak zabaldutako informazioaren arabera, lehenengo erasoa 23:45ak inguru gertatu zen. Hainbat ezezagunek Algortako Ollarretxe kalean zegoen Correoseko furgoneta baten leihoa apurtu eta su hartu ez zuen molotov koktel bat bota zuen barrura. Hamar bat minutu beranduago, Getxoko Maidagan kaleko 47 zenbakian, BBKko kutxazain automatiko baten kontra beste molotov koktel bat bota zuen ezezagunen taldeak. Suak kutxazaina belztu eta kalte ekonomikoak eragin arren, ez zen suhiltzaileen beharrik izan. Patxi Lopez PSE-EEko idazkari nagusiak azpimarratu zuen “kale borroka” bezalako “oztopoak desagertu egin” behar direla prozesua aurrera jarraituko bada. Argazkian, 2005eko abuztuaren 1ean Algortan kiskalitako kutxazain automatiko bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun