EHUk 25 beka eskainiko dizkie Bizkaian erroldatutako eta EHUko edozein campus eta ikastegitan titulatutako gazteei, Alemanian, Frantzian, Italian, Portugalen edo Erresuma Batuan lehenengo esperientzia profesionala eskuratu dezaten. Bekak Enpresetan Praktikak Europan Zehar (EPEZ) programaren lehenengo deialdiaren barruan banatuko ditu Araba, Bizkaia eta Gipuzkoako unibertsitate publikoak, Leonardo da Vinci Europako agentziaren zein BBKren Gaztelanbidean Fundazioaren laguntzaz. Beka bereganatzeko eskaera abenduaren 5era arte aurkeztu ahal izango da Sarrikoko Unilaneko bulegoetan (argazkian), Ekonomia eta Enpresa Zientzien Fakultatearen ondoan. Argibide gehiago nahi izanez gero, 946 013 681 telefonora deitu edo www.ehu.es/unilan webgunea begiratu daiteke.
Beka jasotzeko, “ezinbestekoa da norako herrialdearen hizkuntza ofizialaren ezagutza ziurtatzea edo, bestela, ingelesarena”, unibertsitateak jakinarazi duenez. Aukeratutako lagunek praktika profesionalak egingo dituzte 14 asteko egonaldietan, 2007 martxoaren eta ekainaren bitartean. Praktikak honela banatuko dira: lau aste hizkuntza eta kulturaren aldetik trebatzeko eta hamar aste praktika profesionalak egiteko aipatutako herrialdeetan kokaturiko enpresetan. EPEZ programaren onuradunek diru-laguntza izango dute egonaldiaren gastu nagusiak estaltzeko: bidaiak, aseguruak, prestakuntza, ostatua, kudeaketa eta antolaketa eta abar.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun